Ka Clean Green Jowai Campaign

Jowai: Kum shibynta jong ka jingpyndonburom ïaka jingdap 75 snem ka kot khubor The Shillong Times, la pyntreikam ïa ka ‘Clean up Shillong campaign’ ha kaba la sdang ban pynkhuid ïa ki bynta jong ka wah Umkhrah.

Ha ka 9 tarik une u bnai haka jingïalang kaba la khot da u ma S.K. Lato la ïakren ban sdang kum kane ka juh ka campaign ha Jowai ruh kum ka dak jong ka jingpyndonburom ïa ka jingdap 75 snem ka kot khubor The Shillong Times. Ha kane ka sngi la pynlong ïa ka jingïalang ha kaba la ïadonlang ki riewpwkhmat bad ki nongïalam jong ki katto ktne tylli ki seng kiba pawkhmat ha ka nongbah Jowai. Ha kane ka sngi la wan hiar ruh na Shillong u Manas Choudhury u trai jong ka The Shillong Times, ka kong Patricia Mukhim ka editor jong kane ka juh ka kot khubor bad ka Jannet Street kaba don bynta haka Clean Up Shillong campaign.

Ka jingïalang ha kane ka sngi da kawei ka jingmut kala rai ban sdang kum kane ka juh ka prokram ha ka nongbah Jowai ruh bad la jied ïa u ma S.K. Lato kum u President, u Arwotki Sumer kum u Vice President, u H.H.Mohrmen kum u Secretary bad u Rudolph A. Laloo kum u Assistant Secretary.
Kane ka komiti thymmai ka shong pyrkhat ha ka 13 tarik bad kala rai ban ai kyrteng ïa kane ka jingpyrshang daka kyrteng ‘Clean Green Jowai Campaign’ kane ka komiti kala jied 24 ngut ki dkhot kiba kynthup ïa ki kynthei bad shynrang na ki bynta bapher bapher jong ka shnong Jowai. Ka thong jong kane ka jingpynkhih ka long ban pynkhuid ïaka Ïawmusiang kaba long ka pdeng bad ka ïitkhmih jong ka shnong Jowai. Nalor kata kawei pat ka jingthmu ka long ban pynneh pynsah ïa ka jingkhuid jong ka wah Myntdu kaba ker tawiar sawdong jong kane ka nongbah.
Kane ka dei ka jingpynkhih mynsiem (campaign) naka bynta baroh kiba angnud ban pynlong ïa ka shnong Jowai kaba khuid bad la khot lang ïa baroh kiba don bynta ban ïatreilang na ka bynta kane ka jingthmu. Naka liang jong ki nonngpynïaid ïa kane ka jingpynkhih mynsiem ka jingangnud ka long ban ïatreilang bad baroh kiba bynta ha Ïawmusiang kum ophis jong u DC Jowai, ka JHADC, ka Jowai Municipal Board, ka Dorbar Chnong Tympang Club, Ïawmusiang, ki nongpynïaid jong ki lai tylli ki ïew, ka Ïaw Seiñ Raid Jowai, ka Ïaw chor CNI bad ka Ïaw chyiap balang Presbyterian Church, Jowai ban ïatreilang na ka bynta kane ka jingthmu.
Naka liang jong ka kotkhubor The Shillong Times ruh kila pynpaw ba kin ai ka jingkyrshan mynsiem ban pynlong ïa kane ka jingthmu kaba jop.