Lap ki saiantis ka China, ia ki sur kiba pher kiba wan na haw haw ka sahit bneng

Ka telescope, kaba ram hah jong ka China, ka la ioh lum ia ki sur kiba pher bapher, kiba wan na ki haw haw jong ka sahit bneng.

Katei ka telescope, kaba la tip kyrteng ka Tianyan, ka dei kaba heh 500 bad katei ka la ioh lum ia ki spah tylli ki radio signal, kiba wan na ka thymmei, kaba ka jingjngai ka long kaba jylliew sat lane kaba ki ong ha ka kyntien jong ka science three billion light years.

Kine ki signal, ki dei kiba la tip da ka kyrteng Fast Radio Bursts (FRBs), ki dei kiba wan ha ka sur kaba rit bha bad kiba wan na ka thymmei kaba jngai bah jong ka haw haw bad ia katei ka sur, la ju tip kum ka FRB121102.

Ki saiantis jong ka Chinese Academy of Sciences, ki dang tih tyllong ia kitei ki signal, kiba ki la ioh lum ha u nailar jong une u snem. La shim ruh ba kitei ki sur, kiba ki khot FRB, ki wan na ka tyllong kaba jngai bha bad kim dei satia na ki jaitbynriew ba khyllah lane ki alien.

Katei ka telescope, ka dei ka pliang kaba heh bah, kaba don ha Guizhou, shathie sepngi jong ka China, kaba ka jingheh jongka, ka long kaba ia ryngkat ia 30 tylli ki madan ialeh bol.