Shah kem 13ngut ki paralok U Champion Sangma, ba dawa pisa na ki dkhar

Shillong: Ki don 13 ngut ki dkhot jong ka Achik Holistic Awakening Movement (AHAM), kaba dei ka seng, ba la ialam da U Champion Sangma, kiba la shah kem, namar ba ki dawa pisa na ki dukan jong ki bar Jylla, ha ki jaka them jong ka South Garo Hills, kiba dei ki jaka khaii dewiong kiba jur bha.
Kitei ki 13ngut, ki dei ki dkhot jong ka AHAM South Garo Hills unit.
La kem ia kitei ki 13 ngut hynnin ka sngi, hadien ka jing ujor na ki nongdie dukan, ha kaba ka don ka jinglum khajna beain ha ki bynta jong ka West Khasi Hilsl bad ki bynta jong ka Goalpara District ha Assam bad ki pulit ki iathuh ba katei ka jinglum pisa jubor ka jur bha ha ka iew Jadigittim.
Kitei ki 13ngut ki dkhot ka AHAM, la iathuh ba ki dawa pisa T.500 ia uwei kawei ka dukan bar Jylla, ha kaba la thoh ruh da ka kyntien ‘Non-Tribal Registration Receipt’ ha kaba ki hap ban siew, wat lada ki dei kiba la don laisen kiba biang ruh. Kitei kiba shah kem, la shimti da ki pulit jong ka Nongalbibra PS ha South Garo Hills.