Yn siew bainong noh ka SSC katkum ka dor ka Labour, ong u bah Banteidor

Shillong: U Myntri ba peit ia ka tnad ialehkai ka jylla, u bah Banteidor Lyngdoh u la ong ba ka State Sports Council (SSC) kan sa shong ka jingialang kut snem shen na ka bynta ban pyrkhat ia ka bainong sngi jong ki nongtrei shipor ne casual ha kane ka tnad.

U myntri u la jubab halor ka mat ba la wanrah da ka MLA ka East Shillong ka Kong Ampareen Lyngdoh ha iing dorbar mynta ka sngi ha kaba iadei bad ka jingiakhih jongki ban dawa pynheh ia ka bainong.
U Bah Banteidor u la iathuh ba ka State Sports council ka don 93 ngut ki nongtrei shipor bad dang shen, ki don 44 ngut na kine ki 93 ngut, kiba trei shipor kiba iakhih.
U la ong ba ia kine la siew ha ka dor T. 5000 shi bnai bad ki kam jongki ka long ban pynkhuid ia ka madan ialehkai JN Stadium, Polo, ka Tirot Sing Indoor stadium, bad kiwei.
U bah Banteidor u la ong, “ka Council kan shong jingialang ha kaba kan rah ia ka mat ban siew bainong ia ki nongtrei katkum ka jingpynbna ka Labour Department”.