Ka NRC, kan trei kam noh ha Manipur ruh; yn beh lut khait ia ki mynder na kylleng ka India, ong U Shah

Guwahati: Ka jingialang jong ka kynhun myntri jong ka Manipur, ka la rai ban pyntrei kam noh ia ka National Registration Certificate ha katei ka Jylla ruh.

U Biren Singh, myntri rangbah ka Manipur, u iathuh mynta ka sngi ha ki nongthoh khubor ha Guwahati, ha ka jingialang jong ka NEDA bad u ong shuh shuh “Ka Jylla jongngi bad shibun kiwei ki jylla jong ka thain shatei lam mihngi, ki donkam kyrkieh ia ka NRC” ong U Singh.

U Biren Singh, u iathuh ba ia ka NRC ha Manipur, yn pyntrei kam lyngba ka jing pyniaid jong ka sorkar India, katba kaba ha Assam, la pyntrei kam, katba kum ka hukum jong ka Supreme Court.
Ha kawei pat ka khubor, U Amit Shah myntri kam poh iing ka sorkar India, U Amit Shah, ula kren shai mynta ka sngi, ba ka sorkar India, kan weng lut khait ia ki poi wir, na kylleng ka India bad ym dei satia tang na Assam.
Haba kren ha ka jingialang jong ka North East Democratic Alliance (NEDA), mynta ka sngi ha Guwahati, U Shah, u ong “Ka jingthmu jongngi, ka long ban weng lut khait ia ki mynder na baroh kawei ka ri bad kam dei satia tang na Assam”.
U Shah, ula kynnoh ruh ba ka jing iai bteng ki kam lehnoh ha ka thain shatei lam mihngi, ka dei namar ka jingkhein sting jong ka seng Congress. “Ka dei ka sorkar Congress, kaba la pynmih ia ka jingeh ha ka thain shatei lam mihngi bad ka Congress, kam niewkor ia ka thain shatei lam mihngi, namar ba ki bun eh ki seng pyntriem bapher bapher bad ka ngeit ia ka nongrim ban synshar da ka jing pynpait jaitbynriew”.