Nongpoh: Ha ka jingjia aksiden kaba la jia mynta ka sngi ka surokbah NH-6 ha Ri Bhoi, arngut ki briew ki la duh noh ia la ka jingim, kata kawei ka la jia ha Shnong Umsamlem bad kawei pat ka la jia ha Byrnihat.
Haba iadei bad ka jingjia ha Umsamlem, kaba la jia ha ka por 1 baje ei ei mynsngi, la ioh jingtip ba utei uba la khlad noh hashen u dei uba shong hadien, namar ba katei ka Bike kaba don ia u number ML 05-Q-0172, kaba thmu ban hiar sha ki thain Nongpoh bad ia kaba la niah da u paralok jong u, ka la leit ban tynrah ia kawei ka trok kaba ieng ha surok.
Kumta utei uba shong hadien uba la tip kyrteng kum Banbitlang Khardiengngan, u la hap ha surok bad shah iuh ha ka kawei ka kali kit gas, kaba la pynlong syndon ia u ba un khlad noh hashen, ha katei ka jingjia utei u Nongniah ruh u la mynsaw jur.
Katba ha ka jingjia ha Byrnihat, uwei u samla uba la tip kyrteng kum u Phuleswar Timung, uba dei na ki thain Sunapur Assam, u la khlad noh hashen, hadien ba katei ka Bike kaba u niah kaba don ia u number AS-01-BD-3258, ka la shah tynrah ha kawei ka Trok kit Umphniang kaba don ia u number MN-01-AA-0611, ha Byrnihat mar pyrshah ka Meera Petrol Pump.
La ioh jingtip, ba utei uba la khlad noh u dang mih na 14Mer, Byrnihat da ka jingthmu ban leit sha Rajabagan, hynrei haba u la poi ha katei ka jaka, u la sangeh hapdeng surok ban jam sha Shilliang ka surok, hynrei ha kaba kaba kum katei ka trok kaba la wan na dien, ka la tynrah beit ia u tad haduh ba un da khlad noh hashen.
Haba iadei bad kitei kiba la khlad noh na ka jingjia aksiden, ki Pulit ki la rah noh sha Nongpoh Civil Hospital, na ka bynta ban pyndep ia ki jingdonkam bad ha kajuh ruh ka por ka jingtohkit kan dang iaid shakhmat.
Phi don ban ong eiei?