Kynjah jar ki ophis sorkar, na ka pakhang shnong ba 12 kynta

Tura,2 Jylliew:
Ki sengbhalang ba pher bapher ha Ri-Lum Garo ki khot da ka pa khang shnong ba 12 kynta mynta ka lah sngi u Blei bad ha katei ka pakhang shnong baroh ki dukan, ki skul bad ki ophis sorkar ki la khanglut ha baroh 5 tylli ki District, lait noh ka ophis ki Deputy Commissioner, iathuh ka tyllong khubor.
La ong ba ha katei ka pakhang shnong ba 12 kynta, wat la ka ophis ki DC ka plie lut, hynrei ka jingwan poi ki nongtrei ka duna bha, katei ka pa khang shnong ka la trei kam naduh ka por 5 baje mynstep haduh 5 baje jan miet.
U DC ka West Garo Hills District u Pravin Bakshi u la ong ba namar katei ka pakhang shnong , la phah ia ki Majistor bad ki ophisar rangbah ba kin peit bniah bha khnang ba kan ym ktah ia ka shongsuk shongsain, u la ong ba ha kum katei ka pakhang shnong la hukum ruh ia ki nongtrei sorkar ba kim bit ban pep trei.
Ia katei ka pakhang shnong ha Ri-Lum Garo la khot da ki kynhun sengbhalang bapher bapher kaba la lam khmat da ka Garo Student’s Union, GSU bad ka North East Students Organisation (NESO) kum ka jingpynbor ia ka sorkar ba kan aiti ha ka CBI ban tohkit ia ka jingiap ki ar ngut ki samla u Balsan Marak bad u Witson M Sangma ha along pulit.
Katkum ki lad khubor, la iathuh ba na ka liang ki sengbhalang ki la byrngem ban pynjur ka jingiakhih lada ka sorkar kam sngap ia ka jingdawa jong ki ban aiti ha ka CBI ban tohkit ia katei ka jingiap ha phatok. U President ka GSU u Tengsak Momin u la ong “Ngim shaniah ia ka jingtohkit ka sorkar jylla lane ki Majistor, ngi dawa da ka CBI ban tohkit ia katei ka kam”.
Ha ka juh ka por, na ka liang u nongialam ka Federation of Khasi, Jaintia and Garo People
(FKJGP) u Pritam Marak u la ong “Ngi ai khublei ia ki paidbah kiba la ai jingkyrshan ha ka jingiakhun jong ngi ban wad ia ka jingshisha na bynta ka jingiap u Balsan , ngi la shim ia ka rai ban bteng bad pynjur ia ki jingiakhih lada ka sorkar kam sngap”.
Lah ban kdew, ba halor katei ka jingjia ka sorkar jylla ka la dept hung ia ka kynhun tohkit ba la khlieh da u commissioner of division (Garo hills) u Peter J Ingty, halor ka jingiap u Balsan, bad ka bor pyniaid District ha South Garo Hills ruh ka la thung da ka kynhun tohkit halor ka jingiap u Witson.
Lah ban pynkynmaw ba u Balsan u la iap ha kawei ka Hospital sorkar ha ka 20 tarik u jymmang, katba u Witson uba la suba ba u dei u nongiarap ka GNLA u la iap ha along pulit ha Chokpot ha ka 28 tarik u jymmang, ia u Balsan la kem ha ka 13 katba ia u Witson pat la kem ha ka 27 tarik u jymmang.