Nongstoiñ: U wei u khyllung u ba dang 1 snem ka rta ha ryngkat ki ar ngut ki hynmen jong u ki la lait im na ka jingjia pluh ïing hadien ba ka hynmen ba la kham san jong kitei ki lai ngut shipara, kaba dang 7 snem ka la tur shapoh ki thylliej ding kiba klang bha, na ka bynta ban ioh sei shabar ia la ki para khamtam ia u para khatduh u ba dang thiah hapoh ïing.
Katei ka jingjia pluh ïing ka la jia ha ka 26 tarik u Nailar mynta u snem bad katei ka ïing ka dei jong I kong Elbira Thongnibah, I ba don ruh haduh phra ngut ki khun kiba dei napoh ka shnong Awro ka shnong kaba don marjan bad ka shnong Mariam kaba hap ruh hapoh u pud u sam jong ka South West Khasi Hills District.
Haba iakren bad ki nongthoh khubor I kong Elbira Thongnibah, I ba dei I trai jong katei ka ïing kaba la pluh noh I la ong ba ha katei ka sngi ba la jia katei ka jingjia I dang leit thiew kynbat sha pynthor ha Nongdilang bad I la ieh ruh ia saw ngut ki khun ha ïing, kiba kynthup ia kawei ka khun kynthei kaba la kham san bad lai ngut ki shynrang kiba dang rit kynthup ruh ia u ba dang 1 snem ka rta.
Shuh shuh I la iathuh ruh ba ha katei ka sngi, katei ka khun kynthei kaba la kham san ka la khreh ban shet ja noh, kumta kala leit ban sait ia u khaw shabar, katba ki para shynrang ki jong ka ki don hapoh ïing bad u para khatduh jong ka u ba dang 1 snem u dang ioh thiah hapoh ïing bad hamar kata ka por kynsan kynsan ka ïing ka jong ki ka la kem ding noh bad namar ba ka dei ka ïing trep ka ding ka la stet bha ban pur bad ha katei kapor katei ka hynmen kala ialeh ban pynmih noh ia ki para shabar bad hadien ba kala iohi ba ka ding kala klang bha kala kynmaw pat ba u para khatduh jong ka u dang thiah ha ïing, kumta khlem sheptieng ka la tur shapoh ki thylliej ding na ka bynta ban sei iala u jong u para khatduh.
Ym tang kata la ong ruh ba namar ba ka ïing jong ki ka la don sha kham pajih na kiwei pat kala kham shimpor ia ki para marjan ban ioh sngew, hynrei hadien ba ki para marjan ki la iohsngew ia ka jingiam bad lynniar ki la her sha katei ka jaka ha kaba ki la lap ba kitei ki saw shipara, wat la kila ioh mih shabar ka ïing hynrei ki dang ia ïeng sah ha phyllaw kumta ki para marjan kila leit ban tan noh ia ki bad kaba sngewtynnad ka long ba ha katei ka jingjia ym shym la don kano kano ka jingmynsaw ia kitei ki saw ngut shipara.
Katei ka heprit kaba shlur kaba la pyllait im iala ki jong ki para khamtam ia u para khatduh jong ka, ka dei kaba la tip kyrteng kum ka Aisilin Thongnibah 7 snem katba u para khatduh jong ka pat u dei u ba la tip kyrteng kum u Sikbistar Thongnibah 1 snem bad kane ka long ïing jong I kong Elbira Thongnibah ki la duh noh iala ka ïing ka sem bad ia ki jingdon jingem baroh plain bad ia mynta ki hap ban iasah lang shipor ha ka ïing jong ka hymen jong I kong Elbira Thongnibah kaba dor marjan.
Haba pyntikna shuh shuh ia kane ka jingjia na ka liang jong u Sordar ka shnong Awro u bah Phindro Thongnibah u la pynpaw da kaba ong “Hooid ka long ba katei ka jingjia ka long kaba shisha bad u ai nguh ruh ia u Blei ba u don ryngkat ha katei ka jingjia ha kaba baroh kitei ki khun khynnah kim shym la mynsaw” ym tang katta u la kubur ruh ba ka long kaba shisha ba lyngba ka jingshlur jong katei ka heprit u tei u khunlung u ba shisnem u la lait na ka jingshah bam duh ha ka ding.
U sordar la iathuh ruh ba ha kaba iadei bad katei ka jingjia na ka liang jong ka shnong kala dep ban phah ruh ia ka jingpyntip sha Mawkyrwat C&RD Block, kumjuh ruh sha thanad, sha Hima Nobosohphoh ym tang katta u la iathuh ruh ba na ka liang jong ka Dorbar shnong hi halor katei ka jingjia ka la ia kut ruh ban shu ia lum synniang katta 150 tyngka ka wei ka long iing ki rangbah bad 100 tyngka kaba na kabynta ki long iing jong ki riew kynthei.
Phi don ban ong eiei?