Beh shi beh dkhar, balei ym beh Khasi noh?

Monarch Shabong

Sngew synei bad i synei ban peit ia ka jing kitkhia bad kit khlieh jong ki sengbhalang bapher, ba ki hap ban leit shatei, shathie, sha mihngi sha sepngi ban leit beh ia ki bar Jylla; hynrei hangne, ka wan ruh ka jingkylli, la ka kam ban kit khlieh ia ka shongsuk shong shngain, ia ka rung tuh bad ia kiwei ki kam beain, ka dei ka kam jong ka sorkar bad dei na katei ka daw, ba ki don ki pulit ba kyrpang, kiba peit ia ki khappud bad ka China, Pakistan, Bangladesh bad kumta ter ter.

Kumjuh ha ki jylla ruh, la ju tip ba ki don kita ki pulit kiba peit ia ki nongwan rung tuh, ha ka miet ka iong, ha ka dum ka ngiew bad wat ha ka shai ka sngi ruh, ki don hi kiba peitngor ia ka jingwan jong ki riew kynsha sha u pud u sam jong ka Jylla.

Hynrei kitei ki kyndon, la iohi, kumba ha kine ki sngi, kim trei kam satia haei haei ruh bad dei na kata ka daw, ba ki sengbhalang, ki hap ban leit talasi man ka sngi sha kylleng ka Ri Khasi Jaintia bad donbok toi ba ki kham ia bun ki seng, ha kine ki sngi, ba ki ia poi lut sharum shaneng ban ia phikir ia ka leit ka wan ki poiwir poihap.

Ka phang, pat kaba ngi dei ban iakren hangne, ka long la ka jingbeh tang ia ki mynder, ka don jingmut ne em, ne ka lah dei ka por ban beh teng noh ia ki nongkhot mynder ruh?
Ka jingshisha, hi ka long ba lada dei ha ka poi kha poi man, lada dei ha ka bylla shna iing, lada dei ha ka khaii thied mar thied mata, ka daw bah, ka long ba u don u nongkhot lane u nong tyrwa bad hangta u wan rung u briew, uba nabar; hynrei lada jia ba ym don ba khot, kumta un nym wan satia, namar ba kat uba wan, u wan beh ia ka bai nong, ia ka dor kaba kham bha lane ia ka kam kaba kham thikna bad wat tang u nongthied tin jot ruh, un nym wan satia, lada ym don ba tyrwa.
Ia mynta, lada ki bor shnong, ki bor hima bad ki bor Raid, kin shim shwa khyndiat ki nuksa bad kata ka long kumba la don kiba ong ba kiba ioh tnga dkhar, ki dei ban mih na shnong, nangta ba kiba kwah wai iing, ki dei ban don ki kot ki sla kiba thikna bad kumta ter ter, kumta kan wan hi kajuh ka rukom, ia kiba ia dei kam bad ki dkhar ruh bad lada katei ka ain ka iaid, khlem pep ka jing bunkam beh mynder, kan nym jakhom satia haduh katne katne.