Shah byrngem pynduh kam ki nonghikai SSA ha ki MC Ba pyrshah ia ka rukom pyniaid bakla

Shillong, 2 Jylliew:
Ka managing committee (MC) jong kawei ka skul SSA ha kawei ka shnong kaba hap ha East Khasi hills district la kynnoh ba ka byrngem ban beh kam ia ki nong hikai skul bad ban tait shnong ia kiwei ki nong hikai ha shnong tang namar ba ki pyrshah ia ka jingleh bakla jong ka MC kum ka jingkhate ia ka tulop bad ka rukom ai jingkhein bym shai.
Ka school managing committee jong ka Rynkuskong Sarva Shiksha Abhiyan (SSA) Lower Primary School ka la byrthen ban ai jingujor sha u sordar ka shnong Rynkuskong pyrshah ia ki ar ngut ki nonghikai u David R Marak bad u Saul Chism Sangma bad ki la byrngem ban tait shnong ia ki namar ba ki kren pyrshah ia kaMC ka skul.
“Ka MC ka la pynduh kam ia u David R Marak hadien ba u la ujor FIR ha Mawsynram police station pyrshah ia ka jingpyndonkam bakla ka MC”, la ong u Saul Chism Sangma u nonghikai ka skul ha ka jingiakren sha ki nongthoh khubor hynne ka sngi Nyngkong.
Ha ka FIR la ujor pyrshah ia u chairman, secretary bad u CRC co-ordinator ka MC u Marcus Marak, Clement Marak bad u Benedict Marak.
Ka jingthung ia ki nonghikai la leh da ka MC da ka jingmynjur ka tnad pule puthi ka jylla.
Katkum ka jingong u Sangma, la kynnoh ba ka MC ka la thaw biang ia ka school managing committee khlem da khot ia kano kano ka jingialang bad ki nongkitkam ka skul.
“Ka tulop jong ki nonghikai la khatei man u bnai da ka jingmynjur jong u CRC coordinator da kaba kam ba ka dei ka bai bus”, la ong u Sangma.
U la ong ba ki nonghikai ki ioh tulop T. 9000 shi bnai, ka MC pat ka khate T. 2000 na ka tulop naduh u snem 2009.
U Sangma u la ong ruh ba ka MC kam shym la ai ka shithi thungkam ia ki nonghikai naduh ka sngi ba ki leit trei ha ki skul. Hynrei ki la ioh jinghikai na ka tnad pule puthi kaba khot ban leit ban pyntbit ha ki jingai jinghikai bapher bapher.
U la kynnoh ba ia ka ja sngi jong ki khynnah skul, la ai tang lai sien ha ka shi snem katba ki nongshet la ai T.3000-4000 ha ka shi snem bad ki nongshet ruh la bujli man ka por.
Kine ar ngut ki nonghikai u David bad u Saul ha ka 16 tarik Jymmang ki la ujor sha u Chief secretary uba dei u State Vigilance Commissioner (SVC) ban tular ia kane ka kam.
Ha ka shithi sha u Chief secretary ki la ong ba ki kyntu ia ki bor ba dei peit ban shim ki lad ki lynti ban leh ia kaba donkam.