Shah kem uwei, ba leit nguh lum jingtep ha Langkyrdem

Shillong, 1 Jylliew:
Uwei u nongbuaid, ula shah kem, katba u dang nguh dang dem, ha uwei u lum jingtep ha Langkyr dem bad haba ki nong shong shnong, ki la iohi, ba utei u briew, u leit ban nguh ban dem, ha ki jing tep bapher bapher, kiba don ha ka jingtep shnong, ki la leit ban kem ia utei u briew, ha kaba la aiti noh sha ki pulit jong ka Pynursla.
U Bah Marcom Khar budon Rangbah Shnong jong ka Langkyrdem, haba iakren bad U Rupang, u iathuh ba u don tang uwei, uba don ha Lum Jingtep bad la iathuh ba ki don ki para shnong, kiba iohi, ba u nguh u dem ha ki jingtep bapher ha ka por nohsngi mynta ka sngi. Wat la um shym la pynthikna, ba utei u briew, u dei uba mane ksuid, hynrei, u iathuh ba u dei uba la sma kyiad bad uba ka kyrteng jongu, u dei U Super Tangsong, uba shong ba sah hi ha Langkyrdem.
Hadien ba la kylli na u, ula iathuh ba ki don ruh arngut kiwei pat ki paralok jongu, kiba dih kyiad lang bad kitei ki dei kiba la tip U Rit bad U Bok bad ki bor shnong, ki la shimti ia kitei ki arngut ruh bad aiti ha ki pulit jong ka Pynursla mynta ka janmiet.