10 Jylliew, byrngem pakhang shnong ka HNLC 24 kynta

Shillong, 1 Jylliew:
Ka jingbuhteng jong ka National Green Tribunal (NGT), ban iakren halor ka kam krem khnai, ha ki par dewiong, ka dei tang ka buit pynslem kai, ong ka kyrwoh ba la pynmih da ka HNLC mynta ka sngi.
Ka jingiohi jong ka HNLC, ka long ba kane ka jingbuhteng jong ka NGT, kan long hi thik, kumba ka la rai ka Supreme Court ban khang pom dieng ha u snem 1996.
La ong shuh shuh, ba ha ka 9tarik Jylliew, ka NGT, kan lah ban phah ia ki trai par, ba kin ai jingtip sha ka tnat sorkar, ia ka jingdon jong ki mar, ba la dep sei na krem dewiong bad ha kane ka dur, kan nang pynslem shuh shuh bad kane kan pynsniew lut ia u dewiong, uba don ha ki jaka buh hajan ki par dewiong bad u ban shah pynhiar dor shi kat dei eh.
Ka HNLC, ka la rai namarkata ban weng noh ia ka jingkhot pakhang shnong, jongka ha ka 3tarik Jylliew, kum ka jingsngew khia ia ka jingktah ia ki nongbylla. Ha kajuh ka khubor, ka HNLC, ka kwah ruh ba dei ban khang shi syndon ia ka jingtrei kam ki kompeni dewbilat ruh ha ki bynta jong ka Khasi bad Jaintia hill ruh kumjuh.
Ha kajuh ka por, ka HNLC, ka khot ka maham, ia ka NGT, ba ha ka jingshong bishar jongka, ha ka 9tarik jylliew 2014, ba ka dei ban shim ia ka rai ban ai kam ia ki briew kiba shong khlem kai, na ka jingsangeh tih dewiong bad lada jia ba kam shim ia katei ka rai, ka HNLC, kan khot da ka jingpakhang shnong, kaba 24 kynta, kaba sdang ha ka por 6baje janmiet jong ka 10tarik Jylliew bad kan kut ha ka por 6baje janmiet jong ka 11tarik Jylliew, ong ka kyrwoh na ka Seng, lyngba U Bah Saiñkupar Nongtraw Publicity Secretary,HNLC.