Ka jingtih dewiong, ka ktah ia ki um ki wah

RC Phawa
Jowai, 1 Jylliew:
Ka kam tih bad shalan dewiong na Jaintia hills bad ha ka jylla Meghlaya hi ka long ka wei na ki lad kamai kaba heh bha kaba la sdang na ki phewsnem mynshwa.
Kane ka long kawei na ki jait kamai kaba wan rah shibun ka jingmyntoi ia u paitbah bad ruh ia ka sorkar jylla, ia ki ing ki sem ka shnong ka thaw kham tam ha kito ki shnong kiba mih u dewiong ki la iphuh ipheng bad ka ioh ka kot ka nang kiew, katba nang mih ki snem.
Pynban ka jing khang jong ka NGT ban tih bad shalan dewioh, ka ktah shisha ia ki, namar bun na ki ki ong, ba ki la duh ja, namar ba ki la duh ia ka kam kaba ki ju trei, ha kaba kane ka la ktah naduh u mahajon haduh u nong bylla.
Kiba bun na kito kiba im ha katei ka kam tih dewiong, ki ong ba wat ki nongmih khmat paidbah ruh, ki la jynjar jingmut, ba kim ioh die dewiong shuh bad mynta, ba wat ka iarong tyngka ka District Council bad ka sorkar jylla ruh ka sdang ringsti.
Ha kawei pat ka liang, ki jingshisha ki kdew, ba ha kitei ki phew phew snem jong ka jingtih dewiong, ba ym don ba kynmaw ban iada ia ka mei mariang kaba pyndap pynbiang ia ki jing don kam bad katei ka la ktah ia kito kiba shong shnong ha ki rudwah kiba im ja na kaba tong bad khwai dohkha kum ha ka shnong Sunapur,Borkhat, Kharkhan,Pyrsadwar Natbor, Kwator, Dem Lakang, Pdeng wah khynriam, Kharkhana, Pasadwar, Lumpyngngad bad kiwei kiwei kiba mynshwa ki im da kaba khwai doh bad leit die sha iew ban ioh bsa khun; hynrei mynta naduh ba ki wah ki la sniew lut na ba tuid ka um dewiong, ki la duh noh ia ka kamai jakpoh jongki, na ka kam khwai dohkha.
La iathuh ruh ba ka don ka jingkyrduh um dih, kaba jur bha, ha ki bynta jong ka Khliehriat, Lad Rymbai, Bapung, ha kaba ia ka um ban dih, ka donkam ban wan rah na Jowai, lane don kiba wan rah um dih na Shillong, na ka bynta ban ioh ia ka um kaba khuid ban dih.