Shillong, 1 Jylliew:
“Mynta kiba bun kim tip shuh ia ka dorbar Kur” ong ka Kong Teilinia Thangkhiew, kaba dei ka lamphang jong ka dorbar Khasi District Council. “Kiba bun kim kwah ban tip ia ka thymmei jong ka kur Lajong” ong biang ka lamphang jong ka dorbar District Council.
“Na Khasi District Council, ngim pat don eiei ha kaba iadei bad ki dorbar kur” la ong ka Kong Thangkhiew, hynrei, ka la sot ia ki kyndon jong ka District Council, ha kaba ka don ka bor, ba kin pynbeit ia ki riti dustur bad ka iathuh ruh, ba mynta ka la pynkhie im biang ia ka komiti, kaba dei ban peit ha ka jingiadei jong ki dustur bad ka jingiadei jong ki kur, kiba don ha u pud u sam jong ka Council.
U bah John Kharshiing , uba dei u nongialam jong ki dorbar Hima Khasi, uba shim bynta ha ka seminar jong ka Seng Kur Rynjah, ha Laitlyngkot hynnin ka sngi, ula iathuh ba ki don 3,363 tylli ki ki kur ha Ri Khasi Jaintia. Ha kajuh ka por, u iathuh ruh, ba ki ju mih shibun ki jingkylli ha kine ki sngi, ba kumno kat ha ka Hima Mylliem, ki don tang 49ngut ki myntri ne ki Lyngdoh, ki Basan bad nangta tang 30ngut ki lyngdoh ha ka Hima Khyriem bad sha kiwei de ki Hima. Kaba U Bah John, ula kynthoh, ka long “Ki kur kim tip, la ki nangroi ne nang duh jait”. U bah John, u sngew dei namarkata, ba dei ban don ki ain treikam ia ki 53tylli ki ki Hima kiba don ha Khasi Jaintia hills bad ha kaba kren bynniaw, bas sha Jaintia Hills lei kam don kano kano ka ain kaba iadei bad ki jinglong jingman jong ki kur. La ai jingmut ruh da U bah John, na ka bynta ban don noh ka jingkhein kaba shisien shisnem jong ki Kur bad ba ia ki Schedule Tribe Certificate, dei ban ai lyngba ka jingmynjur jong ki dorbar Kur.
Na ka liang I Meirad Tngency Rynjah, haba kren ha katei ka Seminar, I shim ba ka jait Rynjah, ka sdang wan paw, hadien jong u jumai bah 1897 bad I iathuh ba ka kur Rynjah, ka don ruh, ia u lyngdoh niam ha ka Hima Khyriem. La iathuh ba kawei ka dong ha Rynjah, ka dei, na ka kyrteng jong kawei ka thei samla, kaba la shim ba ka dei ka puriblei, kaba wan na Lum Shyllong, kaba la poi shong poi sah ha katei ka shnong bad haduh mynta, la tip kyrteng ia katei ka shnong kum ka Rynjah. La iathuh ruh, ba ki Mawroh bad ki Rynjah, kim bit satia ban ia poi kha, namar ba katei ka Rynjah, ka poi ia shong ia sah bad uwei uba dei u jait Mawroh ha Rynjah bad la iathuh ruh, ba ka Nongkynrih, ka dei ka thymmei shnong ba nyngkong eh jong ki jait Rynjah.
hooid nga don ban ong khyndiat,NMR ba ngi dei ki kur rynjah,ngi shong ngi I’m ngi sah ha mairang lyngba ka jing wan ialam ki kmie ieid Kmen rad Jong ngi bad ruh ngim don bd ngin ithuh iwei ruh iba haiing n ki meinah Meisan n ki mei tymmen n ki pa tymmen Jong ngi gim shim la ithuh iaki nga sgewsih ban pyntip ruh ba imei ipa ngim don shuh ngi shu long beit tang shiiing baroh 5ngut shipara nga kwah ban tip bad ban wad iaki bahaiinc n ki kur ki jait Jong ngi khublei shibun kur Rynjah uBlei yn don ryngkat bd ngi lem bd phi ruh kumjuh🥺❤️❤️