Kylla ka trok kit Kyiad ha Nongpoh

Nongpoh: Kawei ka trok kaba kit shi trok ka Kyiad, kaba don ia u number AS-01-DD-1540, mynha ka step Sngi Saitjain ha ka por 1 baje ei ei, ka la kylla noh harud ka surokbah NH-6 kaba hap hapoh ka shnong Mawdiangum ha Ri Bhoi.

Katei ka Trok kaba mih na Guahati da ka jingthmu ban pynpoi ia katei ka Kyiad sha Shillong, hynrei haba la poi ha katei ka jaka, ka la kylla beit khram ha katei ka surok bah.
U nongniah jong katei ka trok, uba la tip kum u Bah Batskhem Pakma, u la ong ba ka daw kaba la pynlong ia katei ka trok ba kan kylla, ka dei namar ba la iaid stet palat bad haba la poi ha katei ka jaka um lah shuh ban tehlakam.
Hapoh jong katei ka Kali, ki don haduh lai ngut, hynrei baroh kitei ki lai ngut ki la lait na ki jingjia ba sngewsih lane mynsaw jur.
Khyndiat por hadien katei ka jingkylla jong katei ka Trok, ki Pulit na Nongpoh Police Station, ki la poi sha katei ka jaka bad kaba la iada ruh ia ka jingrong ei ki briew ia katei ka Kyiad.