Ka kren ka khana

Ka kren ka khana: Hato ngi donkam ban pyrkhat shuwa ban kren? Hooid

Kalong kaba donkam shikatdei eh ban pyrkhat bha shuwa ban kren. Phi donkam ban pyrkhat bha namar ka ktien jongphi ka don ia ka bor bakhraw kaba lah ban pynbha ne pynsniew iaka jingmut jingpyrkhat jongphi. Namarkata phi dei ban pyrkhat arsien shuwa ka jingkren jongphi kan poi ha ki rymmiang shyntur jongphi. Ki jingsniew kiba mih naki jing kren jongphi :
1) Ka jing kren khlem da pyrkhat shuwa ka dei ka jingmlien ba sniew kaba lah ban ialam sha ka jingkhuslai bad kan pynsngewsih iaphi khamtam haka por baphi donkam eh ban kren haka jingim jongphi.
Na ki rukom kren sniew ne kren tohmet jongphi, ka jingiadei jongphi kalah ban shah ktah ne kut noh,wat ka jingtreikam jongphi ruh kalah ban hiar palat ban iaka jing stad jongphi. Lada ka long kumne kan sa pynduh jingkyrmen iaphi shikatdei eh kat nang mih ki sngi ki por.
2)Ka rukom kren ka rukom khana jongphi kalah ban saindur iaka jingim jongphi. Na ka por sha ka por phin shem ba ka jing shaniah ka wan halor kaei baphi ong ne kren. Ki ktien jongphi ki thew shai baphi dei ki briew kiba kumno bad kumno ki jinglong jing man phi dei. Lada ki jing kren jongphi ki pynsngewsih iakiwei kamut phi pyni iaka jinglong basniew jongphi. Phi pyni ba phi long ki briew ki bymdon jingmut jingpyrkhat, ki bymsuidniew lane tang ki nong pynsngewsih.
3) Ki jing kren jongphi ymtang ba ki pyni iaki jingbha ne sniew ha sawdong sawkun jongphi hynrei ka rukom kren jongphi ka don ka jingiadei haka rukom pyrkhat pyrdain bad kaba lah ban pyn kylla iaka lynti jongka jingim ba dang sah jongphi. Ki ktien ki thylliej jongphi ki dei ki ban pruid dak iaka jingmut jingpyrkhat jongphi hynrei iada ki ktien ki thylliej jongphi ki long khor, ki jingpyrkhat khongpong, ki jing kren bymlah ban pdiang ne kaba ia nujor palat bad kiwei, kine ki jingmlien kin iai ban iaphi. Kan ym slem shuh phin shem baka jingmlien jongphi kan pynbeit jingmut tang haki jingpyrkhat kiban pynsngewsih iaka jingim jongphi, hangta phin sngewthuh kiba kumno ki jait briew phin long- ki briew kiba don jingpyrkhat sniew bad ba sniew mynsem kiba iohji tang iaka jingbakla jongkiwei lane haka jingim.
4) Lada phim pyrkhat shuwa ban kren shaphang kaei kaba phi thmu ban ong,kan ym shimpor shuh kiba kumno ki jait jing kren phin pyndonkam. Kumno kanr ka jing kren jongphi kan thew ia kiwei lane kumno kin sngew shaphang ki jing kren jongphi.Phi ruh phin ym pyrkhat kumno ka thew iaphi lane sha baroh kito ki jingpyrkhat kiba phim kwah ban pynleit jingmut. [yn dang bteng]