“Ka jingsuk, ka jingsuk, ka jingsuk!”

AIS Suja

Baroh u briew u wad jingsuk u kwah jingsuk. Ka synshar ka khadar ka kwah ia ka jingsuk. Ha kane ka pyrthei jingstad ba mynta bun la ioh suk hynrei ym ioh pat ia ka jingsuk. Ka jingtip jingstad ka roi mynta kum ba la ong da u Daniel Nongiathuhlypa, Daniel 12:4.

Kawei na ki ri barit tam ha pyrthei, ka Israel ka kwah ia ka jingsuk, hynrei ki bun ki nongshun jong ka. La ker ia ka sawdong da ki nongshun naduh mynshwa haduh mynta. Bad kane ka ri ka wad ia ka jingsuk. Kumta ki ri khraw bor ka pyrthei bad ki nongialam khrawbor, ki kular ban wanrah jingsuk ha Israel na ki por sha ki por na ki snem sha ki snem, hynrei ym don jingsuk tang ka iakynad bad ki thma.
Ka Israel mynta, kan sa iateh jutang jingsuk bad ki ri ka pyrthei khamtam ki ri Arab Middle East. Hynrei mynta iasuk, lashai iashun. Bad ka jutang kaba kan sa iateh shen ruh kan long lamler, naba ki ong ka jingsuk ka jingsuk! ha bym don ka jingsuk” Jeremaiah 6:14.
U Blei u ong – “Ki la shukor ia ki briew jong nga kein, ki da ong, ka jingsuk; hynrei ym don jingsuk; haba uwei u tei ia ka kynroh, ki astor pat ia ka da ka sorki ka bym khleh” Esekial 13:9-10.
Ym tang katta, kane ka jingsuk kaba shukor, kan pynkhie thma bad kan don ruh ka thma hapdeng ka Israel bad ki Ri Arab baroh bad ha ka pyrthei hi ha kaba ka Israel kan hap ban ieng rangbah marwei. Dei ha kum kata ka por kein un wan mih u nongsynshar donbor u ban iateh lok shwa bad ka Israel ban pyniasuk ia kata ka thma un leh ialade kum u riew donburom u ban wallam ia ka jutang jingiasuk hapdeng pyrthei (Middle East). Un rung ha kata ka ri badon burom (Israel). Daniel 11:41. Ha kane ka por ba un rung un leh ialade kum u riewblei uba hok un ai hukum ba ki Jiw kin pynieng noh ia ka Temple kaba lai (Third Temple) ha Jerusalem. Kumta ha shuwa ban ioh pynieng ia ka Temple balai, une u nongsynshar lah duh un iateh jutang shwa bad ka Israel, bad kane ka jutang jingiasuk kan long kaba shukor tam.
Ha u Isaiah la ong ba ka dei ka Jutang Lamler. Ki Jiw kin ong – “Naba ngi la pyllong jutang bad ka jingiap, bad ka dujok ngi don jingiakut” Isaiah 28:15.
Ki don jingiakut ha kata ka jutang jingiasuk khnang ba ma ki (Jiw) ki la kwah Temple palat kumta iateh la ka iateh bad kim tip ba yn sa pyndam noh ia kata ka jutang ba ki la iateh. U Blei u la dep kren lypa da kaba ong – “Te ia ka Jutang jong phi kaba bad ka jingiap (Nongsynshar lahduh) YN PYNDAM NOH ka jingiakut jong phi (Jiw) bad ka dujok KAN YM NEH” Isaiah 28:18.
Balei kam neh? Namar kata ka jutang kan long tang 3 snem shiteng. Bad ka 3 snem shiteng kaba Ar pat une u nongsynshar lahduh uba ak Blei ialade un shong ma u pat ha kata ka Temple kaba Lai ia kaba yn sa pynieng. Kane ka dei kata ka jingijli ba pynjot. U Daniel u ong – “Bad naduh ka por ba yn shim noh ia kata ka jingainguh thang (sacrifice) bad haduh ka por ba yn pynieng ia kata ka ka jingijli ba pynjot kan long 1290 sngi” Daniel 12:11. “Une u dei uta uba leh Blei ialade, ba u shong ha ka Tempe ha Jerusalem. 2 Thessoloni 2:4.
Ia kane u Jisu u pynkynmaw da kaba ong – “Namar kata ynda phin iohi ia kata ka jingijli ba pynduh ba la ong shaphang jong ka da u Daniel Nongiathuhlypa” Mathaios 24:15. Ka dei ka por bakordit tam kaba ym pat ju long na myndang long ka pyrthei haduh mynta. Mathaios 24:21. Hynrei kan jia hapoh kita ki por kein. Hapoh kita ki por kein, un pyllong paralok ia baroh. “Ia ki barit, baria, ba khraw batri, riewspah, baduk, ba laitluid, ki mraw, ba yn buh ia ka DAK halor ka kti ka MON lane ha ki SHYLLANGMAT jong ki. Bad kata ka dak ka long 666. Jingpynpaw 13:16-18.
Ngi iohi ba ki Israel kin ym ioh ia ka jingsuk ba shisha tad ynda kin tip bad pdiang ba u Jisu u dei uta u MESSIAH jong ki ong ka ktien u Blei. Baroh ki jingsuk ba ki ioh ki dei tang ki jingsuk ba lamler ba shukor.
Kine kiei kiei kin ym ktah tang ia ka Israel marwei hynrei ia ka pyrthei hi baroh kawei. Hynrei ka Israel ka dei ka baje jong kita ki sngi ki por ba jynjar tam ha pyrthei ba uwei pa uwei uba dangim un ioh mad lada ym shym la rongnoh ia u ha shwa kata ka por jingjynjar.
Kumta ka jingsuk ka long tang kita kiba pule bad kiba iohsngew ia ka ktien jong kane ka jingiathuhlypa, kiba sumar ia kita kiei kiei ia kiba la thoh ha ka: Namar kata ka ia ka la jan” Jingpynpaw 1:3.