Shillong: Ka Seng JSU Shillong Circle ka la ai jingiaroh ia ka kynhun ialeh kai siat suloi ne ka Shooting jong ka Shooting Association of Meghalaya, kiba lah wan rah ia nam bad ka burom ia ka Jylla namar ka jingjop ha ka lympung ialeh kai kaba dang long shu pynlong shen ha ka lympung ia siat kaba long ha nongbah Guwahati hapoh ka 4th Assam Battalion, Shooting Ranges Khalipara kaba long naduh 19 tarik haduh 23 tarik u bnai August 2019.
Ha kane ka lympung jingiakhun, sngewsarong ba ki khun samla jong ka jylla ki lah ioh shim bynta bad ki lah poi ruh sha ka thong bad wan rah ia ka nam jong ka jingjop kiba kynthup ia ka Balarishisha Rani, Anjali Singh, Toiabha Mylliempdah, Shirley M. Kharbuli, Pynkhraw Kharshiing, Uttam Sinha, Dennyson Kyrsian bad kine kin ioh ia shim bynta ha ki Nationals khamtam ha ka National Shooting Championship competition (63rd NSCC) kaban long ha Bhopal ha u bnai November 2019.
Ka seng ka JSU lyngba u President ka Shillong Circle u samla Treiborlang R Suchen u lah ioh ban ia kren bad ki nongpyniaid ka Shooting Association of Meghalaya (SAM) bad u la ai ka jingiaroh na ka liang ka seng JSU bad u lah ong ba sngewdei ban ai mynsiem bad jingiaroh ia ki nongpyniaid jong ka synjuk Shooting Association of Meghalaya ba ki lah shisha ban pynpoi ia ka kynhun ka jong ki sha ka thong wad lada ki kynduh shibun ki jingeh ban pynbit pynbiang ia ki tiar ialehkai hynrei kane ka kynhun da ka mynsiem ban pynkiew ia ki samla ha ka sap ba ki don kam shym lah kynran tat haduh ban kin da poi sha ka thong ka jingjop.Ka seng JSU ruh ka lah ai jingiaroh iaki rang bad ki thei ialeh kai ba kin nang iai minot bad pynkhreh ban pyntbit shuh shuh ialade ba kin lah ban wan rah ia ka nam ka burom ia ka jylla hi baroh kawei.
Ka seng JSU na ka por sha ka por ka la ju kyntu bad ka lah ju dawa na ka sorkar ka dei ban phai khmat ruh ban pynbha pynmiat bad pynbiang ia ki jingdonkam ki rangialehkai jong ka jylla namar ba dei kine kiba wan rah ia ka nam bad burom ia ka Jylla.U samla Treiborlang Suchen u lah ong ba ka sorkar kam dei ban pynduh mynsiem bad jingkyrmen ia ki rang bad thei ialeh kai ka jylla bad ka sorkar ka dei ban pynbiang lut ia ka jingdonkam kum ki tiar ialeh kai bad ki madan ialehkai nabynta ki kynhun ialehkai sports kiba pher ba pher ba kin dang lah ban bteng ia ka jingpynkhreh na bynta ka National Games 2022 ka ban sa long ha ka jylla Meghalaya.U samla Treiborlang u lah ong ruh ba ka sorkar ka lah dei ban pyndep bad pynioh noh ia ka State Youth Policy kaba lah ban ai jingiarap ia ki samla kiba don sap ha kino kino ki bynta bad ba kin ioh jingmyntoi ne u synniang kum ka stipen sha ki rang bad thei ialeh kai ka jylla.
Phi don ban ong eiei?