Pyrshah ki paidbah, ba thung Acting RS ka Hima Mylliem ha shnong Baridua

Nongpoh: Ka jingthmu u Syiem ka Raid Marwet ban leit pynithuh sha ki paidbah ka shnong ka Baridua ia u Acting Rangbah shnong kaba ka Hima Mylliem, ka la jied ia u Bah Agustin Nongrum, ka la pulom noh bad khlem poi sha kaba thmu, namar ki paidbah jong katei ka shnong, ki pyrshah bad kim pdiang halor katei ka jingthmu u Syiem ka Raid Marwet ban leit pynithuh sha ki paidbah.

Ha katei ka sngi, la iohi ba ki paidbah ka shnong Baridua kaba kynthup ia ki longkmie bad longkpa, ki la iamih ryntih ban leit sha iing Durbar, ha kaba nyngkong ki la nangmut ba kan dei ka sngi kaba kin ioh ban jied rangbah shnong, hynrei haba ki la poi sha katei ka jaka, la ioh jingtip pynban ba utei u Syeim u thmu ban pynithuh paidbah ia utei u Acting rangbah shnong, kaba la jied da ka Hima Mylliem. 

            Halor katei ka jingthung Acting Rangbah shnong ka Hima Mylliem ia u Bah Agustin Nongrum, kitei ki paidbah ki la ong ba kim lah ban pdiang bad ki la ong ba lada ka Hima Mylliem ka sngew donkam ban thung Acting, ka la dei ban pyntip sha ki paidbah bad ban shim ia ka sur u paidbah, hynrei ym da kaba shu jied khlem ka jingiamonlang ki paidbah, kumba ka long mynta la shu leh lyndet khlem da kynjoh ktien na ki paidbah nongshong shnong. 
            Ha kane ka sngi, la iohi ba ki paidbah khamtam ki longkmie ki la bitar tyngeh halor katei ka jingthmu wan pynithuh paidbah ia u Acting Rangbah shnong bad la iohi ruh ba kitei ki longkmie ki la leit ban kren markhmat markhmat ia u Ken Syiem, uba dei u Syiem ka Raid Marwet. 
            Dei lyngba jong kane ka sngi, ba ki paidbah jong katei ka shnong bad khamtam eh ki longkmie, ki la ioh ruh ban pynsawa jam ia ka sur kaba long ruh kum ka jingdawa hakhmat u Syiem ka Raid Marwet, ba u dei ban ailad noh ia ki longkmie ba kin iashimbynta ha ka jingiajied Rangbah shnong. 
            Haba iadei bad kaei kaba la jia ha ka shnong Baridua, u Ken Syeim, u la ong ba hadien ba ki paidbah kim hun ia katei ka rai jong ka Hima Mylliem halor u Acting Rangbah shnong bad kumta u la pynsangeh noh. 
            U la ong ruh, ba dei lyngba jong katei ka sngi, kaba la pynlong ia u ba un ailad ia kiwei ruh ba kin thep kyrteng na ka bynta ban iakhun ia ka kam Rangbah shnong ha Baridua. 
            Haba iadei bad katei ka jingdawa ki longkmie ka Baridua ban ailad jied rangbah shnong ia ki longkmie, utei u Syiem u la ong ba un sa peit bad bishar bniah katkum ki kyndon ain, kata naduh ha ka Raid, Hima Mylliem bad District Council.