Pynsangeh ka NGT, ban bishar dewiong ha ka 2 Jylliew Sahkut u dewiong, da ki lak ton ha ki par ha Jaintia Hills

Shillong, 30 Jymmang:
Ka jingshong bishar jong ka National Green Tribunal (NGT), kaba dei ban long ha ka 2tarik Jylliew, 2014 ha Shillong, la pynpep noh, ong ka khubor mynta ka sngi.
Na ka jingiakren bad U ma Balius Swer President jong ka Jaintia Coal Miners & Dealers Association (JCMDA), ula iathuh ba ula ioh khubor mynta ka sngi, ba la pynkynriah noh, na ka 2tarik Jylliew, sha ka 9tarik mynta u bnai.
U Ma Balius, u kren diaw mynsiem shibun eh, halor katei ka jingjia bad ka jing pyn kynriah ba kynsan jong ka NGT. U iathuh ruh ba mynta ka sngi, na ka liang jong ka seng jongki, ki la leit iakynduh ia U Additional Chief Secretery, U Bah Barkos Warjri, ha kaba ki la iakren, na ka bynta ban plie lad ia ki mar kiba la don shabar, hynrei, la iathuh ba U bah Warjri, u la kren shai, ba ka sorkar kam lah ban leh eiei, namar, ba katei ka dei ka rai jong ka kashari. U Ma Balius, u iathuh ba ki kwah ban iakynduh mynta ka sngi, ia u myntri rangbah bad kumjuh ia U Secretery Rangbah ka Jylla, hynrei, kim shym la ioh lad satia, ban iakynduh, namar ba kim don ha Shillong.
Ha kajuh ka por, la kren diaw da U Ma Balius, ba lada ka sorkar Jylla, kam ailad ban die ia kine ki mar, kiba la don shabar, kumta, ka jingeh, ka long ba u dewiong, uba don da ki lak ton shajrong jong ki par, un sa shu lehnohei lut noh. “Ka rong ka sniew, ka bor jong ka sulphur, ka hiar noh bad bad lada wan sa u slap uba heh, un rong noh bad kan ktah ia ki wah ki um, kiba don shajan jong kitei ki jaka buh dewiong” ong utei u nongialam ki trai par dewiong.
U Ma Balius, u kren diaw mynsiem jur ruh ia kane ka jingleh ba kyndit jong ka NGT, da kaba u ong “Ka NGT, ka ialehkai bad u paidbah bad ka khein tad dor ia ka Jylla jongngi”.
Kaba la kren sngewkhia da utei u nongialam, ka long ba ka seng, ka la shim jingkitkhlieh ban ap haduh ka 2tarik Jylliew, hynrei, mynta, haba la nang pynjlan shuh ia ka sngi jingshong bishar bad lada jia ba u paidbah, u khih bitar, kan long kaba eh ia ka seng, ba kan pynthanda bad u da ong shuh shuh “Ka sorkar bad ka NGT, kin hap ban kitkhlieh”.