Ka Border Welfare Committee ka ban peit halor ki kam kyntur pud ka Assam

Nongpoh: Ban khanglad ia ki kam kyntur pud ka Assam ha kito ki shnong kiba don ha khappud ka Meghalaya-Assam, khamtam eh ha ki thain Khanapara, kaba dei ka thain kaba mar syndah eh bad ka Assam, hynnin ka sngi Saitjain, ka la don kawei ka jingialang ha ophis treikam u Syiem ka Raid Marwet, na ka bynta ban iakren halor katei ka kam bad lyngba jong katei ka jingialang, la mih kawei ka Committee ba thymmai, kaba la tip kum ka Border Welfare Committee bad kaba dei ka Committee ka ban peit kyrpang beit tang ia ki kam khappud ha katei ka thain.

Ha katei ka jingialang ban thaw ia katei ka Committee, la iadonlang da ki nongialam ka HNYF, Northern Region, u Syiem ka Raid Marwet, ki Seng Longkmie na Khanapara, u rangbah shnong ka Khanapara uba la mih khmat na ka Dorbar shnong lem bad ki trai jaka kiba don jaka ha katei ka thain.
            Ha katei ka jingialang, la mih ka sur kaba sngewkhia da kitei ki briew kiba la don ha katei ka jingialang, ha kaba ki la ong ba katba nangmih ki sngi, ka Assam ka la nangkyntur ia u pud u sam ka Meghalaya bad khamtam eh ha Khanapara, kaba dei ka shnong kaba don hapdeng ka jingma lada ym don ba shimkhia ban halor u pud u sam, namar ba ka la dei lypa ka jaka ba iajan eh bad ka Guahati.
            Lynga jong katei ka jingialang, la jied ruh ia ki nongkitkam jong katei ka Committee, ha kaba la jied ia ka Kong Idalin Lyngshing kum ka President, u Bah Marcus Marten kum u Vice-President, ka Kong D. Dorphang kum ka Secretary, u Bah Donroy Kshiar kum u Asst. Secretary, u Ken Syiem kum u Organising Secretary, u Bah Jeremy Lyngdoh, Rangbah shnong ka Khanapara kum u Adviser lem bad kiwei kiwei.