Dawa tohkit ka NPP ia ka jingkhlad ar ngut ha kti ka ain

Shillong, 30 Jymmang:
Ka NPP ka la dawa ba ka sorkar ka dei ban thung ia ka jingtohkit kaba laitluid halor ka jingkhlad jong ki ar ngut ha Garo Hills ha kti jong ka ain.
“Ngi kwah ia ka jingtohkit kaba laitluid ban pynlong ia ka jingtohkit ha lor ka jingkhlad jong ki ar ngut ha kti jong ka ain. Ka jingtohkit ka dei ban khlieh da u nongbishar ka High Court,”, la ong u MLA ka NPP u James K Sangma.
U la ong ba kim don ka jingngeit halor ka jingtohkit da ki majistor ba la thung da ka sorkar ban pynshisha ia ka jingjia.
“Ngi tip ba ka jinglap jong kine ki jingtoh jong ka sorkar kim nym ai ia ka jingjia kaba shisha bad kin pyrshang ban iada ia ka sorkar”, la ong u Sangma.
U la ong ba ka jing shisha ka long ba kine ki jingkhlad kyndit jong ki ar ngut ha kti ka ain bad don bun kiba iakynduh kum kane ka jingjia hynrei ki khlem paw pyrthei.
‘Kane ka paw namar ka jingtrei borbah jong ki lad pathai khubor bad ki sengbhalang kiba thad madan ia ki kam bymman jong ki briew ka ain sha ki paidbah katkum ka jingshisha”, la ong u nongialam ka NPP.
U Sangma u la ong ba ka tnad kam pohiing ka donkam ban pdiang ia kane ka jingshisha bad ka dei ban pynbeit ia ka jingbakla jongka.
‘Ngam tharai ba kan long kaba biang ha ka liang ka sorkar ban buhriah ia ka jingshisha da kaba len jubor ha kum kane

ka jingjia kaba la wanrah ia ka jingtieng ia ki paidbah ha ka jylla”, la ong.
Haba kdew ia ka kamram jong ki pulit, ban iada bad ai ia ka jingshngain ia ki paidbah, u MLA ka NPP ka long kaba sngewsih ban iohi ba ki pulit ki buhriah na ka jingkitkhlieh bad ki la shim pynban ia ki jingim briew.
“Nga tharai ka tnad pulit ka donkam ban pynbeit bha ia kane ka jingdkoh jongka ban ai jinghikai ia ki pulit ba kin tip haba ki pyntreikam ia ka ain”, la ong u Sangma.
U MLA ka NPP u la takrain ruh ia u Myntri Rangbah ka jylla u Mukul Sangma uba bunkam tang sha Delhi.
“U Myntri Rangbah um don ka jingkitkhlieh. Ngi khmih lynti ba un don ha jylla ha kum kane ka jingjia”, la ong u Sangma.