Dang shim por, kaiphod ka FFT ki MLA ban wad kyrduh bording

Shillong, 30 Jymmang:
Ka Fact Finding Team (FFT) kaba la thaw da ki liang pyrshah ban wad ia ka daw jong ka kyrduh bording ha ka jylla, ka dang shim por ban thaw ia ka kaiphod.
“Ngin shim por kat to katne namar ba ki donkam ban pule bniah kham jylliew ban wad ia ki daw ka jingkyrduh bording ha ka jylla shwa ban ai ia ka kaiphod kaba biang”, la ong u chairman ka FTT u Dr Jemino Mawthoh haba iakren hynne bad ki nongthoh khubor ba la don lang ki heh ka MeECL ha Lum Jingshai.
U Dr Mawthoh u la ong ba hadien ba la lum ia baroh ki jingdonkam, ka kynhun kan shong jingialang biang shwa ban thaw ia ka kaiphod ban sdang ban pyniaid ia ka kam.
“Ngi la thmu ban leit jngoh ia ka Umiam Hydel Electricity Project Stage I bad II ha ka taiew ba nyngkong jong u Jylliew”, la ong u chairman ka FTT.
Ha kajuh ka por u MLA ka NPP uba dei u dkhot ka FFT u James K Sangma u la ong ba ka jingialang bad ki heh ka MeECL ka long kaba sngew tynnad.
“Ngi la pyrshang ban sngewthuh halor ki jingeh ba ki iakynduh. Ngi la iakren ia ki mat bapher bapher kiba iadei bad ka jingsam bording”, la ong u Sangma.
Haba kylli la ka FTT kan leit wad jingtip na ki stad ki jhad halor kane, u la ong ba ki la wad jingtip shwa na ki stad ki jhad halor kane.
“Ngi borabor ngi wad ia ka jingtip shwa na ki stad ki jhad ban pynshong dor ia ka jingtreikam bad ka jinglong jingman jong ka bording ha kane ka jylla”, la ong u nongialam ka NPP.
Shwa ia kane, ka FTT ka la leit jngoh ia ka Myntdu-Leshka Hydro Electric Project, bad hadien ba la dep jngoh u Dr Mawthoh u la ong ba ka long kaba dang kloi than ban iakren halor ka jingtreikam ka MeCEL.