Sa 22 tylli ki shnong ha 12 Shnong kiba don kajuh ka rukom siaw, rwai kum ka Kongthong

Shillong: Ki don sa kumba 22 tylli ki shnong ka 12 shnong kiba don kajuh ka rukom siaw rukom rwai da ka sur haba khot ia u briew bad kam dei satia tang ka Kongthong.

Kila pynpaw ruh ia ka jingpyrshah lada u myntri rangbahduh ka ri u Narendra Modi un ithuh tang ia ka Kongthong kumba la bna wur wur hadien ba la wan jurip ruh dang shen u MP ka BJP ia ka Kongthong u Rakesh Sinha.

Nalor ka thain 12 shnong, ki don ruh kiba ki shnong kiba ju leh ia kane ha them Wahrew kiba ju leh ia kane kum ka shnong Wahkhen, bad kiwei, la iathuh u sordar ka Warbah, u bah Budlang Mawpat haba kren myn hynnin ka sngi sha ki lad pathai khubor ha Shillong.

Katto katne ki sordar bad rangbah shnong ba hap ha ka thaiñ 12 shnong mynta ka sngi, kila pynshai paidbah ba ka jingmih ha ki lad pathai khubor ba ka sur khot briew ne jingrwai iawbei ka don ha shnong Kongthong, kam dei kaba shisha namar ba tang ha ka thain 12 shnong, ki don sa 22 tylli eiei ki shnong kiba leh bad dang leh ia kane haduh kine ki sngi.
U sordar na Warbah bah Budlang Mawpat, na Mawshuit bah Kyntiew Khongshei, sordar na Raid Rymmai bah Fantin Phanbuh, Rangbah shnong ka Khrang bah Dewson Shabong, na Raid Mawber kila pynpaw ia ka jingpyrshah jur lada u myntri rangbahduh ka ri u Narendra Modi un ithuh tang ia ka Kongthong bad lada kine ki shnong kim ioh lang ka jingithuh haba ki dei kijuh kiba dang leh ia kane ka jinghikai ki longshwa.
Watla kim don eiei ban pyrshah ia ka jingpynpaw ka Kongthong ia kane ka jingleh hynrei kim pdiang ba kan shu kam pat marwei bad kan ialam bakla sha ka pyrthei.
“Ngim pyrshah eiei ia ka jingsdang ka Kongthong ban pynpaw ia kane ka jinglong tynrai hynrei ngim lah ban pdiang ia u Modi ne ka sorkar pdeng ban ithuh tang ia ka Kongthong”, la ong kine ki sordar.
Kila kyntu ia u Conrad Sangma, u Myntri Rangbahduh ka ri u Narendra Modi ba kin ithuh lang ia kine ki shnong bad ban pynrung ha ka herritage site ka UNESCO, kumba la don ba la pynsngew ia kane.
Ban pynshisha ia kane, la pyni ruh da ka jingrwai da ka kong Teh Khongsit kaba rwai hapoh kamra Shillong Press Club ia ki pralok ka shnong Khrang kiba wan ha kane ka jingialang.
Ban pynshisha ia kane, la pyni ruh ia kane ka jingkynud sur ba la leh da ka kong Teh Khongsit da kaba rwai ia ki para shnong ka Khrang.
Ki shnong ha ha ka thain 12 shnong, kiba dang leh ia kane ka jingkhot sur jingrwai ki long ka Pdei, Khrang, Mawshuit, Mawmang, Puhbsein, Thangtim, Warbah, Sder, Mawsohmat, Myiong, Tluh, Nongbah Mawshuit, Mawtongreng, dewiong, Langsteng, Pdang, Thangkyrta, Jarain, Mawbawein, Rymmai, Mawshken bad Sohkynduh nalor ka Kongthong.