Da u Bah Philip Marwein
Sngew kumba suk eh na ka bynta ka UDP ban jop na Shella Constituency bad ban ioh ia ka kam Speaker bad ka long kaba rhah bha na ka bynta ka UDP ban dawa na ka MDA baroh ar tylli ki kam. Kine ki kam ki long ba ka MDA ka dei ban mynjur beit tang ha u candidate UDP na Shella bad ka dei ban ai beit ia ka kam Speaker ha u briew jong ka UDP. Kane shisha ka long ka jinglalot jong ka UDP.
Kam dei kaba suk eh na ka bynta u UDP candidate ban jop na Shella constituency wat la u dei u khun jong u Dr. Don ruh namar ka ilekshon hi ka dei ka ilekshon bad ka don ka jingialeh bad ym pat tip lypa iano ki paidbah kin pynjop. Ka politiks hi ka dei ka politiks bad ym lah ban khein suk. Kiwei ki candidate ruh ki don bad ym tip ia ka buit jong ki ban jop ilekshon. Ha ka liang ka peisa tyngka kaba long kaba donkam bad iaidkam bha ha ka por ilekshon shisien ba ki candidate ki ialeh ki don ia ka peisa ban pyndonkam ha ka por ilekshon. Kumta kam long kaba dei ban khein troin iano iano ruh ha ka por ilekshon namar don kiba jop salit ruh ha ka por niew ia ki vote.
Na ka bynta u Balajied Synrem mynta um pat dei u Candidate, u dang shu thmu ban ieng ialeh ia ka ilekshon. Un long u Candidate tad lada la pyllait ia ka kyrteng jong u da u Returning Officer jong ka Election. Hynrei ia mynta hi u dang dei tang u aspirant lane u ba dang shu kwah ban iakhun ia ka ilekshon. Kane ka dei ka sien kaba nyngkong na ka bynta jong u bad ngim tip la ki paidbah na ki shnong bapher bapher jong ka constituency ki la tip bad ithuh bha ne em ia u bad hato u la ioh jingieid ne em na ki. Hynrei, kaba ngi kyrmen ka long ba jait ba u dei u khun jong u Dr. Don u ba la long MLA la 7 sien kynthih lehse ki la don hi ki paidbah kiba la ithuh lypa ia u, hynrei ia ka jingieid te ngim tharai ba u la ioh.Hynrei la jar katta jait ba u dei u khun jong u MLA uba rim tam bad u ba la bat ruh kum u Chief Minister, khlem pep ki paidbah ki la don kiba ithuh ia u bad lahban don kata ka jingsngew jan. Kawei ruh ka jingkhlad noh ba kynsan jong u Bah Don ka la pynkyndit ia ki paidbah jong ka Shella Constituency, kumba la pynkyndit ia kiwei ruh, kumta ka lah ban treikam ka jingsngew jem mynsiem (compassionate ground) bad kumta, kane ka jingsngew briew ka lah ban kylla sha ki vote ruh.Tangba ym tip katno ngut eh kan ktah khamtam lada ka ilekshon kan long hadien bun bnai. Ngi shu khmih lynti ba ka By-election sha kane ka constituency kan wan kham kloi khnang ba ki paidbah jong ka Shella kin dang rhem ha ka jingsngew briew. Hynrei ka long kaba shai kdar ba tang ka jingsngew briew marwei kan ym lah ban wanrah ia ka jingjop lymda da ki paidbah ki jied da ka jingjieid, jingshaniah bad da ka jingioh khwan myntoi. Namar, ym lah ban len ba bun ki paidbah nongthep-vote ki ngop ha ka jingiohmyntoi. To ngin kyrmen bad ki nongthep-vote jong ka Shella constituency kin ym long kumta bad ka long ka bymdei satia ban iapli ia ka vote bad ka peisa.
Lada phai biang sha ka MDA, ngim pat tip haduh mynta la ka MDA da kawei ka sur kan kyrshan ia u Balajied Symrem ne em, namarba ym pat iashong pyrkhat bad tip shano kan poi. Lehse lah ban don kiba ieng ialeh na kiwei pat ki party kiba hapoh ka MDA ruh, ym tip. Hynrei kumba ka paw ki paralok hapoh ka MDA kin mynjur lang ia une u ba la paw kyrteng lypa.Ym pat paw kano kano ka dak ka shin ba don kiwei ruh na ka MDA kiba thmu ban iakhun nangthie. Lada jia ba ka MDA ka iabeit lang tang ha une uwei, ka lynti jong u ruh kan kham suk bad lada baroh kawei ka sorkar kan kyrshan ia u Balajied marwei ka lynti jong u kan kham suk shuh shuh. Kat haduh mynta, napdeng ki party, tang ka seng Congress ka ban pynieng kyrtong bad lada jia ba iakhun tang ka UDP bad ka Congress kan long kaba itynnat ka lympung iakhun bad ka jingiakhun ruh kan long kaba jwat bha.
Lada phai biang sha ka kam Speaker ba ka UDP ka kam ba ka dei ka jong ka, kane ka jingkam ka long ka bymdei. Hooid mynshuwa la ai ha u Bah Don kein na ka UDP hynrei mynta ba u la khlad ka kam ka la thylli bad kam dei ia kano kano ka party hapoh MDA ban shu kam nongkynti ia ka, hap ban ialeh da ka ilekshon hapoh Assembly. Ka UDP ka lah ban don candidate Speaker hynrei kiwei ruh ki don la u jong u candidate, ka NPP ka don, ka HSPDP ka lah ban don, ka PDF ruh ka lah ban don. Ka lynti kaba dei eh na ka ka bynta ka UDP ka long ba kan sei ne tyrwa ia la u candidate Speaker, kiwei ki party ruh kin tyrwa la u jong bad ieh ha ka MDA ba kan rai uno na ki un long u candidate ba iamon lang na ka bynta ka kam Speaker. Ka UDP ka tip shai ruh ba ym lah ban shu ai kyrteng ia u briew u ban ym lah kot bor ban shimti ia kane ka kam. Kiwei ruh ki tip shai ia kata. To ngin kyrmen ba ka jingstad kan synshar halor ka jingjied ia u kyrtong Speaker.
Phi don ban ong eiei?