Leh kynjlein u khar Silchar ia ka longkmie ba leit thied juti ha Khliehriat

Khliehriat: Ka seng Meghalaya people’s United Front-East Jaintia Hills District (MPUF-EJHD) ryngkat ka Khliehriat Circle, hapoh ka jingialam u President jong ka seng u Michal Chyrmang bad u president ka Khliehriat Circle u Kyrshan Blah, ka la leit ai jingsneng ia uwei u bar jylla uba shong die juti ha kawei ka dukan ha Khliehriat uba kyrteng u Abdul Karim na ka shnong Silchar.

Katkum ka jingiathuh jong kawei ka longkmie, katba ka dang peit juti ia ka khun jong ka ha ka dukan utei u Abdul , utei u Abdul Karim ula pyrshang ban pynjan sha katei ka longkmie da kaba u leh mynleh kumba pyni ia ki juti kiba u don bad nangta pat u kren sa da ki kyntien kynshlein bad da ki ktien khlem akor ruh ia katei ka longkmie. Ymtang katta u tei u barjylla u la nud haduh ban pynbor ia katei ka longkmie ban ai u number phone jong ka. Ym tang katta, hynrei U Abdul ula leh buit tuh ruh da kaba thep tang shilliang ka juti ha ka synduk jong katei ka juti. Ka jingmut jong utei u bar jylla, ka long ba katei ka longkmie kan wan biang ha ka dukan jong u bad un pyrshang biang ban leh ia ki kam jong u ban khroh bad ban pan ia u number phone jong ka. Kaba sngew phylla haba ka seng ka pan ia ka trading license utei u barjylla um lah ban pyni sha ka seng.