3 taiew ai por ka Supreme Court ia ka sorkar Jylla, halor ka jing ujor ka HPC

Shillong: Ka Supreme Court hynnin ka sngi, lyngba ka bench kaba lai ngut jong ki nong bishar, ka la ai por ia ka sorkar Jylla, lai taiew ba kan jubab, halor ka jing ujor jong ka Harijan Panchayat Committee (HPC) ban pyrshah halor ka jingkwah jong ka sorkar Jylla, ban ioh jingkhein ia ka jingdon ki nongshong shnong ha Them Metor.

Na ka liang ka HPC, ka la ujor sha Supreme Court, ban pyrshah halor ka jingkwah jong ka Shillong Municipal Board, ban shim jingkhein ia ka jingdon ki nongshong shnong ha katei ka jaka, ha kaba ka Meghalaya high court ruh, ka la rai ksan ia ka sorkar Jylla, halor katei ka phang bad ka la bthah ia ka HPC, ba kan iatreilang bad ka sorkar Jylla.

Lah ban pynkynmaw, ba ha U Jylliew 2019, ka Meghalaya High Court, ka la shim ia ka rai, ha kaba ka la bthah ia ka HPC, ba kan ai jingtip, halor ka jingkwah jong ka Shillong Municipal Board, ia ka jingdon jong ki briew kiba shong ha Them metor.