Jur ka jing ia khroh briew, na bynta ban ioh shuki President UDP

Shillong: Ka la don ka jingiaknieh long president ha ka UDP hadien ba la khlad kyndit u Dr Donkupar Roy dang shen. Katkum ka khubor ba la iohlum na ki katto katne ki nongialam ka UDP, la iathuh ba ka jingiakhroh jong kito kiba kwah ban long president kala iaid shaid shaid mynta.

Ka UDP kan jied ia u president thymmai ha ka 11 tarik Nailur ban wan, na ka bynta ka samoi treikam lai snem kata 2019-2022.
Ka khubor ba la ioh jingtip na ka UDP, ka la ai dak ba kiba kham paw ban iakhun ia kane kam president ki long u senior working president bah Bindo M Lanong, u General secretary u Dr Jemino Mawthoh, u working president bah Paul Lyngdoh bad u bah Metbah Lyngdoh.
Napdeng kine, u bah Bindo u dei uba kham iaw bad kham rim tam ha ka UDP, uba long teng u MLA barim, bad MDC shu sieh ba mynta ka KHADC katba u bah Metbah u dei u MLA ba la jop lai sien bad uba kham rim tam napdeng kine ki MLA ka UDP ba mynta.
U Dr Jemino u dei MLA barim, u nonghikai ha NEHU katba u bah Paul u dei u MLA barim bad u MDC ba long ruh u EM ka KHADC mynta.
Watla ym pat lah ban ong mano ban shah jied hynrei la ioh jingtip ba ki nongialam ka UDP kim kwah ban iapra tang namar ka kam president bad ki kwah ban don ka jingiatylli lada ioh mano mano ruh.