Dawa weng lut ia ki Weighbridge, lait noh ha Entry & Exit Point

Jowai: Ka All Jainita Cement and Clinker Transports Association ka la dawa ba ka sorkar ka dei ban weng lut ia baroh ki Weighbridge kiba don ha shi lynter u Surok bah kiba don hapdeng Malidor bad Byrnihat.

‘Ngi dawa ba ka sorkar kadei ban weng lut ia kine ki Weighbridge, lait noh tang ia kito kiba don ha ki jaka rung ne mih (Exit & Entry Point) kiba don ha Byrnihat, Malidor bad kiwei kiwei, hynrei kaba don ha Um-tyr-a bad kaba ha Hynniewmer”, ka sorkar ka dei ban weng noh ia ki mardor”, la ong u Secretary ka AJCCTA, u ma Kyrshan Dkhar.
U la iathuh ruh ba ia kane ka rai, la shim ha ka jingialang kaba la long ha ka 16 tarik une u bnai ha kaba da ki spah ngut ki trai trok ki la wan poi sha ka jingialang kaba la long ha Hynniewmer.
“Ka jingdon jong ki Weighbridge nalor kito kiba dei ban don ha ki Entry bad Exit Point ki long ka jingduhnong kaba khraw ia ki trai trok nalor ba ki hap ban siew ia ki tax bapher bapher”, la ong u ma Dkhar bad u la bynrap ruh ba ka Seng ka dawa ruh ba ka sorkar kadei ban pynshai sha ki paidbah hangno ba ki trok kidei ban thew ia ka kit ka bah jong ngi.
Ka seng ka la dawa ruh ba ha kawei ka District kadei ban don tang kawei ka ChecK Point jong ki Pulit.
Ha East Jaintia Hills ka don tang ha Shohshrieh, ha West Jaintia Hills pat ka don ha Phramer bad Ummulong bad teng teng ha Jowai Bypass, ha East Khasi Hill ka don ha Mawryngkneng bad Diengpasoh katba ha Ribhoi pat ki don haduh Diengngan, Lad-umsaw, Umling, Byrnihat bad teng teng ha Nongpoh.
Ki Nongialam ka AJCCTA kila pynpaw ba kane ka jingdon bun tylli ki Check Point kam don jingmut eiei hynrei tang ka buit ban ioh lum pisa da ki pulit namar ha kawei kawei ka Check Point ki trok driver ki hap ban siew da ki spah tyngka.
Ha ka juh ka por ka AJCCTA ka la pynrem jur ia ka jingshim kabu jong ki nongtrei ka Amsarin Weighbridge ha kaba ki la shim haduh 1200 tyngka kum ka bai thew ha ka jaka 200 tyngka kumba la buh da ka sorkar.
Halor kane, ka Transport Department kadei ban peit ia ka jingleh jong kitei ki nongtrei ka Amsarin Weighbridge lym kumta ka seng kan hap ban leh eiei kaba pyrshah halor kane ka jingshim kabu katei ka Amsarin Weighbridge.