Shillong: Ka Seng Samla Mawlai Nongkwar ka la ther tyngeh ïa u Rangbah Shnong ka Mawlai Nongkwar, u Bah Rapbor Roi Thangkhiew namar ba u la ai mynjur ïa ka Mayasheel Retail Ltd, Bazar India ban plie dukan ha Mawlai Nongkwar, khlem ka jingtip ka Dorbar Shnong bad jing mynjur lang jong ka Executive Committee jong ka Shnong.
Haba ïakren bad ki nongthoh khubor, mynta ka sngi, u President ka Seng Samla, u Bah Esakiel S. Mond, u la ong ba dei ha ka 5 tarik mynta u bnai ba ka Seng Samla Mawlai Nongkwar ka la leit ïa kynduh ïa u EM Trade, u Bah Paul Lyngdoh bad ba ki la ïoh kopi ïa ka mynjur, ba ai u Rangbah Shnong, kaba pyni ba ïa kane ka mynjur, ba la soi da u Secretary Shnong, Bah S.M Mawïong, ba la ong ba la ai hadien ba la pynlong ïa ka Dorbar Shnong bad ryngkat ka jingmynjur ka EC jong ka Shnong.
Shuh shuh u President ka Seng Samla, u la ong ba hadien ba katei ka Kompeni ka la sdang ban plie ïa kane ka dukan ha ka 1 tarik mynta u bnai, ka SSMN hadien ka jingialang ba kyrkieh jong ka EC ka ba la long ha ka 2 tarik mynta u bnai, ka la ai da ka jingthoh sha u Rangbah Shnong ban pan jingshai mano ba la ai mynjur bad kiei ki kyndon kiba don ha ka mynjur bad kumjuh ruh ka soskular, ba la ïasoi ryngkat ka jingdon ki nongtrei ha katei ka dukan.
Ha ka 5 tarik haba la khot ïa ka EC jong ka Shnong bad ïa ki nongmihkhmat ka Seng Samla,na ka liang u Rangbah Shnong u la ïathuh ba la shong dorbar ka Block I jong ka Shnong bad kyrpad ïa ka EC ban ïamynjur ïa ka mynjur kaba ladep ai. “Kane ka EC ka la shu kut kumto khlem poi shano shano, namar ka Seng Samla kam ïoh ïa ki jingpynshai kiba biang”, la ong u President.
Nalorkata ha ka jubab sha ka Seng Samla u Rangbah Shnong u ong ba don tang kumba 10 ngut ki nongtrei bar jylla, katba ha ka jingshisha ki don palat 20 ngut bad ym tip hangno ki shong ki sah ruh.
Dei halor katei ka nongrim ba ka Seng Samla ka la ai da ka jingthoh sha u Acting Syiem ka Hima Mylliem ban pynpaw ba kim don jingshaniah shuh ïa u Bah Rapbor Roi Thangkhiew kum u Rangbah Shnong, namar kine ki kam ba u la leh bad kumjuh ruh la phah jingthoh sha u Dy. CEM ka KHADC ba dei peit ïa ka Elaka. Ha ka 9 tarik mynta u bnai, ka Hima Mylliem la la khot hajir ïa u Rangbah Shnong bad kumjuh ruh ïa ka Seng Samla.
Dei ha ka 13 tarik u Nailar ba ka Hima Mylliem ka la pynmih ïa ka hukum ba la weng noh ia u Bah Rapbor Roi Thangkhiew kum u Rangbah Shnong bad ha jaka jong u la thung shipor ïa u Bah Maurice Lyngdoh Myrdon kum u Acting Rangbah Shnong, uba long u rangbah ba la shakri ïa ka Shnong la bun bun snem.
Ki nongïalam Seng Samla ki la kyntait ruh ïa ka jingkynnoh ba don ka jingïaleh politik halor kane ka kam. “Baroh ki nongkitkam ka Seng Samla kim ïadon bynta eiei bad ki Seng Saiñpyrthei, hynrei dei kita kiba kynnoh kiba donkti, namar uwei na ki, udei uba la ïaknieh ticket ha ka elekshon baladep”, la ong uwei na ki nongkitkam ka Seng Samla.
Nalorkata la ïathuh ki Seng Samla ba u Rangbah Shnong um shym la leit shim ïa ka Sanad na u Syiem ka Hima Mylliem, wat lada u la shah jied naduh ka 23/8/2018, hynrei u la ai mynjur bad treikam kumto khlem ka jingïoh bor.
Katne ki shnong ha sor dei tang ka shnong mawlai kaba da kit khia shisha iaka lawei ka jait bynriew khasi paka. Nga ngeit ba ka shnong mawlai kan long ka ba khuid ba suba kumba juh long naduh kipor ba mynshuwa namar ki dei tang ki khasi bad ki paradoh para snam ki ba shong ba sah haka tei ka shnong…. ko nong mawlai wat pynjaboh ia ki um ksiar um rupa…. nga ngeit ba phyn ia lah ban pynkhuid ia ki jaboh ki ja bain … khublei shubun