Ngan peit shwa ia ka UPF, tang ban pynskhem sorkar kam don jingmut: Adelbert

Shillong: U MLA marwei ka KHNAM na North Shillong, u bah Adelbert Nongrum u la ong ba um pat rai ban iasoh bad ka United Progressive Front (UPF).

“Ngam pat rai ban iasoh bad ki, ha ka jingshisha ki la dep iawer ia nga ban iadon lang ha ka kynhun UPF”, la ong u bah Adelbert.
U la kubur ba kila la iawer lang ia u ban iadon ha kane ka kynhun da kaba ai daw ban pynskhem ia ka sorkar. “Ngam pat shim kano kano ka rai namar ba ngan bishar bha namar ba ioh ki thaw tang na ka bynta ka kabu sain pyrthei”, la ong u bah Adelbert.
U bah Adelbert u la ong, “Ban shu sngew khia tang ban pynskhem ia ka sorkar kam da don jingmut than hynrei kaba donkam ka long ban sngewkhia kumno ban synshar na ka bynta ka jylla bad ki trai muluk”.
U la ong ba la 47 snem la pynskhem ia ka sorkar, bad ka la dei ka por ban peit ia ki mat bad lada ki biang ki mat , u lah ban iasoh bad ki ne bad kano kano ka kynhun kaba ieng ban iada ia ki trai muluk ym ia ka myntoi shimet.
Ia ka UPF ba don 6 ngut ki MLA la thaw da ki MLA ba kynthup ia ka PDF kaba don saw ngut ki MLA, ka NCP kaba don uwei u Saleng A Sangma, u MLA shimet bah Lambor Malngiang. Ki la dep ai jingthoh ruh sha u Symbud Lamphang ka iing dorbar mynshem taiew ban ithuh ia kane ka kynhun jongki ha iing dorbar thawain.
Baroh kine ki MLA ki don lang ha ka sorkar Meghalaya Democratic Alliance (MDA) ba ialam da ka NPP.
Ha ki riew peitngor ia ka sain pyrthei, ki la sma ba kane ka kynhun kan dei kaban pyni bor ia ka Regional Democratic Alliance (RDA) ba la thaw da ka UDP bad ka HSPDP, kiba don 10 ngut ki MLA.