“U Rahul, u nongleh biria”

Kochi, 28 Jymmang:
Uwei na ki nongia lam jong ka seng Congress na Kerala, ula ther tyngeh, ia U Rahul Gandhi, halor ka jingshah rem kput jong ka seng Congress, ha ka elek shon, kaba dang shu dep bad ula kynnoh ruh, ba U Rahul, u dei u riew biria (joker) bad ia utei u riew biria, dei ban weng noh na ka kam jongu, lane ba u dei ban iehnoh, ia katei ka kam Vice President, kaba u bat mynta.
U TH Mustafa, uba dei u myntri barim jong ka sorkar India, u dawa ba dei ban weng noh mardor ia u Rahul bad ba dei ban aiti ia ka kam nongialam, ha ka Priyanka. Haba kren ha ki kotkhubor, ha Kochi, U Mustafa, u iathuh ba U Rahul, u leh ialade, kum u nongleh biria bad ka dei na katei ka daw, ba ka seng Congress, ka la rem kput, ha ka elekshon Lok Sabbha, kaba dang shu dep. Ka bynta jong u myntri rangbahduh, kam dei ka kam jong u khynnah rit bad u paidlang jong ka Ri, u tip bha bad kumta, ki ai da ka jingshah pynrem kaba jubor tyngeh ia ka seng Congress.
“Ka jingleh lamwir jong U Rahul, da kaba u pyndokam ia ka computer bad ka internet, hapdeng jong ki katto katne ngut ki dkhot jong ka CWC, kiba shu iaroh beit, kat ia kaei kaba u leh bad katei ka la pynlong, ba un shah rem kput” ong U Mustafa, uba dei mynshwa u myntri jong ka sorkar barim jong U K Karunakaran, ha ki snem 1991-95 bad uba la bat haduh san sien, kum u dkhot jong ka dorbar Jylla ha Kerala, ha kaba la ju shim ruh, ba u dei u bym ju riej ban kren pyrshah ia ki nongialam jong ka seng jongu.