Ka jingjop U Ma Shibun, na Pynthor, dei ka vote pyrshah AL Hek: BJP

Shillong, 27 Jymmang:
“Ka jingjop jong U Ma Shibun Lyngdoh, na Pynthorumkhrah, ha ka elekshon MP, kaba dang shu dep, ka dei ka vote pyrshah AL Hek jong ki paidbah jong katei ka Constituency” ong U Dipayan Chakravorty, uba dei U General Secretery jong ka seng BJP ha ka Jylla. “U Bah Hek, ula trei tyngeh na ka bynta U Ma Vincent Pala” ong shuh shuh, utei u nongialam jong ka seng BJP.
Kum ban pynkyn maw, U Ma Shibun, u kandidet jong ka seng BJP, u la ioh 6,984 vote, katba U Ma Vincent Pala, u kandidet jong ka seng Congress, u ioh tang 4,183 vote.
Haba la kylli shuh shuh, ba hadien jong ka elekshon MP, haba ka BJP, ka la jop don burom, ki don ne em, kiba wan tyrwa ialade ban pyniasoh bad katei ka seng. Ka jubab na utei u nongialam, uba la rim jong ka seng, ka long “Ki don kito kiba la don ha kiwei ki seng sain pyrthei, kiba wan tyrwa ialade’ bad u ong biang “Ngim salia ia kito, hynrei ngi kwah ia ki riew paidbah, ba kin wan ban pyniasoh bad ka seng” bad ula ong shuh shuh, ba ha kine ki sngi, ki don bun, kiba wan sha ka ophis jong ka seng, na ka bynta ban tyrwa, ban pyniasoh ialade. “Ki la iohi, ba ym don lawei shuh, lait noh na ka seng BJP” ula ong shuh shuh.
Halor ka jingkylli shaphang U bah AL Hek, uba dei U MLA barim jong ka seng BJP bad ki hamsaia, ba u iakynduh ia ki nongialam BJP ha Delhi, ha kine ki sngi, ka jubab na utei u nongialam, ka long “U dei u myntri sorkar, u lah ban iakynduh ia ki myntri jong ka sorkar India ha Delhi” hynrei, u kyntait pat, ba ka don ka jingthmu jong U bah Hek, ba un leit phai biang sha ka seng BJP.
Ha kawei pat ka khubor, ka seng BJP, lyngba u kandidet jongka, U Ma Shibun Lyngdoh, ka ai khublei ia ki paidbah, kiba la kyrshan tyngeh, ha kane ka elekshon MP, kaba dang shu dep. “Wat la ngam shym la jop, hynrei phi la ailad ianga ba ngan iai trei, na bynta jong ka seng bad jong ki paidbah” ong ka kyrwoh na utei u kandidet jong ka seng BJP.
Ka seng BJP, ka ai burom ia U Narendra Modi, ba ula shimti ia ka kam myntri rangbahduh bad ba ula jied myntri ruh ia U Sarbananda Sonowal bad U Khrien Rijiju, kiba dei na ka dong shatei lam mihngi bad U Rijiju, u dei ruh, uba peit ia ka jingtreikam jong ka seng BJP, ha ka Jylla Meghalaya.