Rai ka sorkar U Modi, ban wad ia ka pisa tuh na ki Bank bar Ri

New Delhi,
27 Jymmang:
Ha ka jingiakynduh jong ka kynhun myntri jong U Narendra Modi, kaba nyngkong eh mynta ka janmiet, la shim ia ka rai ban thaw ia ka kynhun tohkit kaba kyrpang, ka Special Investigation Team (SIT), ban wad ia ka jingdon ka pisa tuh shabar Ri bad katei ka dei, katba kum ka hukum jong ka Supreme Court jong ka India.
U myntri rangbah duh, U Narendra Modi, ula pyniaid ia katei ka jingialang jong ka kynhun myntri, kaba nyngkong mynta ka sngi. Hadien ka jingialang, kaba la long ar kynta kynthih, u myntri sorkar, U Ravi Shankar Prasad, ula iathuh sha ki kokthubor, ba ia katei ka kynhun tohkit, yn khlieh, da u nongbishar barim jong ka Supreme Court, U M V Shah.
U Modi, ula kren shibun eh, ha ki jingialap elekshon jongu, na ka bynta ban wad ia ka jingbuh pisa tuh jong kiba bun ki riew sain pyrthei bad ki heh spah sha ki Bank bapher jong ka pyrthei bad ban wan rah noh ia katei ka pisa tuh sha ka Ri.
Ka Supreme Court, ka la buh por shitaiew, ia ka sorkar, ba kan thaw ia ka SIT, ba kan wad jingtip, halor kitei ki pisa tuh, kiba la buh sha ki bank, kiba shabar ri. U Prasad, uba dei ruh u nongkren jong ka seng BJP, u iathuh ba katei ka dei ka jingkut jingmut jong ka sorkar ban ai ia ka jingshakri kaba hok sha u paidlang jong ka Jylla bad la iathuh ruh, ba U Justice Arijit Pasayat, un long u Vice Chairman jong ka SIT.