Ka jing pynduh ia ka article 370,35 A, ka dei halor ka nongrim, kawei ka ri, kawei ka riti synshar, ong U Modi

Ha ka jingkren jong U Narendra Modi, myntri rangbahduh ka Ri, mynta ka sngi, na rynsan jong ka Red Fort, ha New Delhi, U Modi, ula kren shai ba ka jing pynduh ia ka article 370 bad ka article 35 A, ka dei halor ka mynsiem jong kaba u ong “one nation, one constitution (kawei ka ri, kawei ka riti synshar)” bad u ong ba ka dei ruh ka sur, kaba hap sngap ia ka jingkwah jong ka Ladakh bad ka Jammu and Kashmir.

“Hadien ka jing ia khlad jong ka India Pakistan, kito kiba wan sha India, ki im suk im sain, hynrei kito kiba shong ha Jammu and Kashmir, kim ju don jingsuk satia. Kane ka rai, ka long ban pynmyntoi ia u paidlang, uba im ha la ki jong ki shnong, ha kaba mynta ki lah ban iakren beit mar khmat ia ki jingeh jongki bad ka sorkar India” ong U Modi.

Ha katei ka jingkren, ula pynbna ruh ba ka sorkar India, kan pynlut 3.5lak klur, na ka bynta ban pynpoi um dih, sha man kawei pa kawei ka thliew iing ha ka Ri, ha ka skhim jong ka Jal Jeevan Mission.

Ha ka jingkren U Modi, u pynsngew ruh halor ka jingdonkam ia kawei ka Ri, kawei ka elekshon, kaba mut ba ki elekshon dorbar Jylla, kin long lang ha kajuh ka por ba pynlong ia ka elekshon Lok Sabbha.

Mynta ka sngi, U Modi, ula pynbna ruh ia ka jingdon jong uwei u heh duh jong ki shipai, na ka bynta ban peit ia ka jing trei kam jong ki lai tylli ki tnat shipai, kiba kynthup ia ka tnat shipai um, shipai khyndew bad shipai suin ruh kumjuh.