Yn thad madan ka EC u Bah Ardent, ia ka bamsap ka Rong ka Taw Mawphlang

Shillong, 27 Jymmang:
Ka Executive Committee (EC) ka KHADC ka la rai ban thung ia ka jingtohkit halor ka jingpyn lut ia ka jingpynlong ia ka Rong ka Taw Tynrai ne ka Monolith Festival kaba pynlong ha Khasi Heritage Village ha Mawphlang.
“Ngi la thaw ia ka kynhun tohkit ban pynshi sha la ka don ne em ka jingpyndonkam bakla ia ka jingpynlut pynsep na ka jingshna ia ka Khasi Heritage Village”, la ong u CEM ka KHADC u Bah Ardent Miller Basaiawmoit ha kane ka sngi Hatmajai hadien ka jingialang ka EC.
Kham mynshwa, u CEM u la ong ba ka la don ka jingsngew artatien ia ka rukom pynlut ia ka pisa na ka bynta ban pynlong ia katei ka projek.
“Hynrei ngi kwah ban ioh ia ka jingtip kaba bniah halor kane ka mat shwa ban shim ia ka rai ban thaw ia ka kynhun tohkit”, la ong u CEM ka KHADC.
U CEM barim ka KHADC u Bah Pynshngaiñ N Syiem u la len kham mynshwa ba ka la don ka jingpynlut bakla ia ka pisa ba la mang na ka bynta kane ka Khasi Heritage Village .
U Bah Syiem u la ong ba ka jingmih khubor ba ka T. 6.38 klur la mang na ka bynta ka Khasi Heritage ka long kaba bakla.
“Nga kwah ban pynshai ba la mang T. 5.98 klur na ka 13th Finance Commission”, la ong u Bah Syiem uba dei u chairman ka KHUDA.
U la pynshai ba ka Council kam pat siew lut ia ka pisa sha ka kompeni ka Anderson Structural Consultant namar ba ym pat leit ban jurip ia ka kam ha katei ka jaka.
“Ngi la iaid katkum ka Meghalaya PWD (Building) Schedule of Rate 2010-11 haba pynkhreh ia ka projek”, la ong u Bah Syiem.
U Deputy CEM u Bah Teinwell Dkhar u dei u EM uba dei peit ia kane ka tnad Art and Culture ha ka EC kaba rim bad kaba mynta ruh. Hynrei na ka liang u Bah Basaiawmoit u la ong ba dei ban sngewthuh ba ia ki rai ba heh, la shim da u CEM.
“U EM u lah ban nym tip ruh shaphang kane ka rai ba la shim da u CEM,” la ong u Bah Basaiawmoit.