Ym pat rai ka KHADC ia ka hukum khang tih dewiong ka NGT

Shillong, 27 Jymmang:
Ka Executive Committee (EC) ka KHADC kam pat rai ban kyrshan ne ban kyntait ia ka hukum ka National Green Tribunal (NGT) ban khang tih dewiong thliew khnai ha ka jylla. Hynrei ka pynpaw ia ka jingsngew khia ia ka jingeh ba la iakynduh da ki hajar ki paidbah ka jylla halor kane ka jingkhang kdam ka NGT ban khlong dewiong da thliew khnai.
“Ngin pule bniah shwa ia kane ka mat shwa ban shim ia ka rai jong ngi halor ka hukum ka NGT”, la ong u CEM ka KHADC u Bah Ardent Miller Basa iawmoit hadien ba la wai ka EC hynne ka sngi Hatmajai.
“Ngi sngew khia jur ia ki hajar kiba la im ja na kane ka kam kiba la iakynduh jingeh mynta hynrei ngi sngew khia ruh ia ka jingpynjot ia ka mariang bad ruh ka jingkharoi ki briew nabar namar ka jingwan bylla sha kane ka jylla. Hynrei donkam ban pyrkhat ba ka jingim jong ki trai shnong kam dei ban ktah bad ka jingpynjot ia ka mariang, kam dei ban ktah lada tih dewiong ne kiwei kiwei ki kam”, la ong u Bah Basaiawmoit.
Ha kawei ka liang, u Bah Basaiawmoit u la ong ba ka EC ka la rai ban thung ia u Majistor ba kham rangbah duh kum u Additional Judge jong ka Council.
“Kane ka kam ka dang sahteng la lai snem. nga sngew kmen ba ngi la lah ban thung ia u Additional Judge,”, la ong u CEM ka KHADC.