Wat iam kong Thei

Khana ba bteng

    Lynnong- 5

Katba nang iaid ki sngi ka jingiadei u Bah Deng bad ka Lanosha ka la nang shai bad paw pyrthei. Ka jingwan sah miet u Bah Deng ka la sdang pur khana hangne hangtai. Ka Kong Mon ka ba iohi ia ka jingwan iaid lynti jong u riew phylla dang step ka la poi iathuhkhana ha tyndong shkor jong ka Kongthei Daplin ha kawei ka sngi.

“Balei phi ong kong…?” La kylli pynstet ka Kongthei

“Don uwei u briew te pha uba wan iaid lynti nangne dang step I kumba u mih na iing ka Kmie ka Lanosha…” La iathuh bniah ka Kong Mon

Ka Kongthei ka la kohnguh khlieh namar ka la sngewthuh ba la dei beit u Bah Deng.

“U briew ba kumno hato batai ne ka met ka phad jong u….” La kyrpad ka Kongthei ia ka Kong Mon

Ka Kong Mon ka la batai kumba ka iohi. Hangta hi ka Kongthei ka shu ong kyndit

“O nga la sngewthuh ba nga ruh nga ithuh ia uta u briew…” La ong ka Kongthei

Ka kong Mon ka sngap noh ia kaei ba ka Kongthei ka iathuh . Hadien ba la dep iakren bad ka Kong Mon, kham shiphang ar phang ka mih noh nangta bad wut ka leit beit beit sha la iing.

Ka Kongthei Daplin ka la sngewthuh mynta ba u Bah Deng pleng u la iashong bad ka Lanosha. Ha la mynsiem ka la dap da ka jingbitar lep ia ka Lanosha.

” Ka arsap pleng …” La kren wei briew ka Kongthei

“Ngan leit sei beit na iing…” Ka Kongthei ka la wan dem pyllup ha jingthiah bad ka iam jam eh.

Hadien ba la shlei miar ka jingbitar ka mih na la iing bad ka la thmu hi thiaw ban leit sha iing ka Lanosha hynrei ynda ka poi ha phyllaw ka hab wan phai biang noh namar la wan iing ka para jong ka. Kumta ka la pynjai jai noh ia lade shipor.

Ha kata ka miet ka Kongthei kam nang iohthiah ioh dem shuh. Ka mynsiem jong ka, ka la dom hi thiaw ia ka Lanosha ba ka la shukor ia ka. Katba ka nang pyrkhat shaphang u Bah Deng katta ka dohnud jong ka , ka la nang pait. Ka miet baroh kawei ka la pynjaw ummat ia ka Kongthei khlem ai thiah ai dem shuh.