Yn pynher lama sngi laitluid, U MR ha Shillong, u Dy CM ha Nongstoin

Shillong: Ka jingialang ka kynhun myntri mynta ka sngi ka la pynbeit pali ia ki myntri bad ki MLA ba kin leit pynher lama lai rong ka ri ha ka sngi Laitluid ka ri ha ka 15 tarik Nailar mynta u snem. Ha Shillong yn pynher lama u Myntri Rangbah u Conrad K Sangma, katba u Symbud Myntri Rangbah u bah Prestone Tynsong un pynher ha Nongstoin bad u Symbud Lamphang ka iing dorbar u Timothy D Shira un pynher lama ha Sohra.

Kiwei ki myntri kin leit ban pynher lama ha ki nongbah ki district, ki sub-division bad ki administrative unit. Ia kane la pyntip da u symbud myntri rangbah u bah Prestone Tynsong.
U bah Lahkmen Rymbui yn pynher ha Tura, ha Jowai u bah Comingone Ymbon, Nongpoh bah AL Hek, Williamnagar u Rakkkam Sangma,, Baghmara u Samlin Malngiang, Resubelpara Kyrmen Shylla, Mawkyrwar bah Metbah Lyngdoh, Ampati bah Banteidor Lyngdoh bad ha Khliehriat bah Hamletson Dohling.