Sniew palat liam, ka surok ba 2Km, na Rngi Shyllong sha Liewlong

Shillong: Ka surok naduh Rngi Shyllong, kaba mih ha Liewlong ka la sniew palat liam ha kine ki sngi.

Katei ka surok, ka dei kaba ki kali kiba bun bah, kiba leit sha Jowai, sha Nongthymmai, Madanryting, ki ju iaid thikna lem bad ki nongleit kai pyngngad sha Lum Shyllong, hynrei ka jingsniew tasam, ka la buh jingeh ia ki kali jong ki riew shimet, kiba iaid lyngba katei ka surok, kaba pyniasnoh bad ka surok Pomlakrai.
Lyngba ka jingther slap kaba jur ha kine ki khyndiat bnai ba ladep, la iohi ba ka bor jong u slap, ka la khlong lut ia ki maw surok, ia ka khyndew, ha kaba ki la mih ki thliew kiba jylliew bad kiba long ka jing mynsaw ia ka leit ka wan ki kali rit, kiba iaid na Lad Lum Shyllong ban mih sha Kseh Bilat jong ka surok bah Jowai.
Ka jingsniew than ka surok, ym tangba ka pynthut ia ka leit ka wan, lane ia ki nongshang kai pyngngad, hynrei ka long ruh ka jingdkoh kaba khraw ia ki nongrep jong ka tei ka thain, ba kin pynpoi iew ia la ki jong ki mar rep, wat la katei ka thain, ka long kaba sboh bad kaba seisoh shi katdei.
Na ka liang jong U Rupang, ula iakren bad U bah Mike Sohtun, uba dei U Rangbah Shnong ka Rngi Shyllong bad utei u rangbah ruh, ula pynpaw ia ka jingsngew diaw jongu, ia ka jingsniew tasam kane ka surok.
Ha kajuh ka por, u iathuh ba ka tnat PWD, ka la pynbiang ia ka jingkhein jingdiah, halor ka jinglut jingsep ia katei ka surok bad nagta u iathuh ba U bah Lambor Malngiang, Chairman State Planning Board, ula iathuh ba ia katei ka surok, yn bei na ka pisa, ka ban wan na World Bank bad la kumno kumno yn trei noh ha ki bnai tlang mynta u snem, lane ha ki sdang bnai jong u snem ban sa wan.
Katei ka surok, ka dei kaba jrong ar kilometre bad ka dei ka surok, kaba pyniasoh ia ki nongleit jingleit, kiba mut wan na sha ki thain Smit ban leit sha Nongstoin, Sohra, Mawkyrwat bad kylleng kylleng.