Pynjynsur jingjngai ban buh dukan tim

Shillong: Ka sorkar myn hynnin ka sngi ka la rai ban pynjynsur ia ka kyndon ban buh dukan thoh tim na ka 300 metre sha ka 100 meter na ki jaka ba don ki jaka pule, ki jaka sumar, jaka mane blei.

Haba pyntip ia kane, u symbud myntri rangbah u bah Prestone Tynsong u la ong ba ka sorkar ka la pdiang ia ka jingtyrwa ka tnad ERTS ban ailad ia ki dukan thoh tim ban buh dukan na ki skul, kolej, bad ki hospital.
“Kane ka rai la pynjynsur hadien ba la bishar bniah ba ka jingbuh kyndon haduh 300 meter ka la jngai palat khamtam ha ka nongbah Shillong kaba khim bha ki jaka”, la ong u bah Prestone.
U la ong ba la pynkylla ia ka kyndon 6 (1) ka Meghalaya Regulation of the Game of Arrow Shooting and the Sale of Teer Tickets Act, 2018.
U Symbud myntri rangbah u la iathuh ruh ba ka sorkar ka la ai bor halor ka pisa ka tyngka ha u Secretary ka Lokayukta katkum ka kyndon ka ain.