“Ka BJP, ka la mynjur ban burom ia ka soskular ka India bad ki Hima Khasi”

Shillong: Ka Dorbar Federation of Khasi States, (FKS), ka khmih lynti ia ka Sorkar BJP – NDA ban pyniaid sted ha ka ban pyndep ia ki jingkular bad ki jingiateh (Instrument of Accession bad Annexed Agreement – 17 August 1947 ) kaba la mynjur bad soi hapdeng ka Sorkar India bad Federation of Khasi States bad ki jingkular ki jingiateh bad ki Naga, kumba la Sorkar BJP ka la trei sted ban pynbeit ia ki Kam Jammu & Kashmir.

Kum ban shu pynkynmaw ka “policy paper for Meghalaya” kaba la soi da U PB Archrya, i/c Organisation Five Border States North Eastern Region, BJP (u dang shu shong thait kum u Lat ka Nagaland) bad u Bah H A Roy Kharpuli, President BJP ha u snem 1997, ha kaba ki la kular ba kin burom ia kine ki jingkular.
Shuh shuh ka Federation of Khasi States, lyngba u Paiem Phrester M Syiemlieh, Syiem Hima Nongkhlaw, ki la ai ia ka Memorandum ha ka kti u myntri rangbah duh ha u bnai Jymmang 2016 mynba u wan sha Shillong, hynrei haduh kine ki sngi ym shym ioh kano kano ka jubab.
Kumta ka Dorbar FKS ka da khmih lynti ba kane ka Sorkar BJP – NDA ba kin shim khia ban thaw lad ban pyndep kham sted ia ki jingkular ki jingiateh kumba la ia kut naduh ka 17 tarik August 1948, kumba ka Sorkar BJP ka la trei sted ban pynbeit ia ki kam ha Jammu & Kashmir.