Shongkun ka shad Lakhympong ha Thadrang

Nongpoh, 26 Jymmang:
Ka shad Lakhym pong ba ar sngi, ba la pyn long da ka Raid Thadrang, kaba la ju pynlong man la u snem, ka la long ha ki tarik 23 bad 24 tarik Jymmang, 2014.
Ha kitei ki sngi, ka shad Lakhympong ka la long kawei na ki shad kaba shongkun bha, ha kaba la wan shim bynta da ki samla samhoi ka Raid Thadrang, ki longkmie longkpa, ki heprit, ki Syiem ki basan jong ka Raid Nongtung bad ki riew pawkhmat ka Raid Thadrang bad kiwei kiwei, kaba ka thong jong katei ka shad ka long ban pynneh pynsah ia ka riti dustur ba ki longshuwa manshuwa ki la buh la seng naduh kulong kumah.
U Kongsan ha ka sngi ba pynkut noh ia katei ka lympung shad Lakhym pong u la long u Bah Ardent Miller Basaiawmoit, MLA ka Nongkrem, kum u Kongsan bad u Syiem Khynnah ka Hima Khy rim, u la long kum u Sym bud Kongsan.
La shim bynta lang ruh da ka jingdon u Syiem ka Raid Nongtung, u Bah M Shadap, ki khat ar ngut ki Basan ka Raid, u Chairman ka lympung shad Lakhympong Committee, u Bah B Lyngdoh, u Secretary Bah I Makdoh, u Finance Secretary u Bah E Bina, lem bad ki dkhot ba kynthup ia u Bah J Lamare, u Bah E Sohtun, u Bah J Lamarai bad u Bah M Masharing.
Ia katei ka shad la pynlong ha madan Langbha jong ka shnong Thadrang bad ka la long ka shad kaba shongkun watla duna bha ka jingwan shim bynta jong ki briew ha katei ka lympung shad, namar katto katne ki daw iakajia khappud ha kine ki sngi, hynrei man la u snem kane ka shad ka long shisha kaba shongshit namar ka jingdon bun paid bha ha kum kitei ki lympung, kaba ki nongshad ruh shynrang bad kynthei ki shad pyllun pyllun sawdong ka .
Ha u snem ban wan ia katei ka shad yn pynlong sha Umtlieh, Raid Nongtung, ha ki tarik 13 bad 14 tarik Lber, 2015, la pynbna da u Bah B Lyngdoh kum u Chairman jong katei ka committee.