U Chowkidar bad ka pisa balang T.3klur

Ka ktien ba khuid jong U Blei, ka ong “wat kynshew ki spah ialade ha ka khyndew, ha kaba ka khniang bad ka sarang bad sha kaba ki nongtuh, ki pynpei, ki tuh ruh” kitei ki long ki jingthoh, kiba lehse, ngi hap ban pyn kynmaw ialade, haba kum kine ki jingjia, ki jia, ha kaba ia ka pisa Balang, yn shu bam kloi ei, da mano re.
Nalor kitei ki kyntien, ka wan sa ka mat halor ka jingbun pisa jong ka Balang Mawkhar, ha kaba la iohi, ba kam lah shuh ban pyn donkam ia ka pisa, kat haduh ba ka komiti balang, ka la jah jingkhein ia ka pisa kaba kot sha ka T.3klur haduh hynriew snem kynthih bad balei ba la hap ban ong ba ka bun pisa bad ba ka jah jingkhein, ka long namar ba kam tip satia ia la ka jong ka jingdon pisa, ka jingdon pisa ha Bank bad nangta kam tip hi ruh ia ka jingkhein jingdiah kaba biang, kaba shim por haduh hynriew snem kynthih.
Ka jingjia ia ka Balang Mawkhar, khlem pep, ka la dei ban pynkyndit thiah ia ki balang ha Sor, kiba heh pisa, ba kin pyrkhat thymmai ialade bad ia la ka jong ka jingthmu jongki, namar ba kajuh ka jingngeit, kajuh ka balang, hynrei ka iapher tang ka kyrteng balang bad ki don da ki bun bah ki balang ha nongkyndong, ki bym don tang ki iingmane bad ki bym lah bor ban pdiang ia ki jingiaseng bapher, namar ba ki trai balang, ki dei kiba duk tasam shisha.
Ngi tip shai, ba ka jingmut kaba don ha uwei pa uwei u dkhot jong kano kano ka balang, ka long ba haba u ai jing ai nguh ne u ai kano kano ka jingiarap, ka long ba kan leit sha ka kam ba bha, lada dei ha ka balang lane ha ki jing iarap sngewlem sha kino kino ki longiing lada dei ki dkhot ka balang ne wat ia ki bym dei ruh bad ka jingmut hi khlem pep, kan nym don ban kynshew ia katei ka pisa, lane ban leit thep ha Bank.
Kane ka jingjia, khlem pep, ka la ktah ia ka burom ka ijot bad ka jingtip briew bad wat ia ka jing shakri Blei jong ka Balang Mawkhar lem bad kiwei de ki kynhun balang ha ka Ri Khasi Jaintia bad ka la dei ka por, ba ki bor pyniaid ka Synod lem bad ka Assembly, ba kin sei madan lut khoit ia baroh ki jingshisha, ba kan mih lut khoit ka ksaid ka ksar bad ka jaboh jabain.