Khlad arngut ki samla na Baridua, ba kylla ka Dumper halor ka Bike

Nongpoh: Ha kawei ka jingjia aksiden ba sngewsih, kaba la jia hynnin ka miet ha Khanapara, ha kaba arngut ki samla na ka shnong Baridua, Ri Bhoi, kiba la tip kyrteng kum u Boney Narleng bad u Albert Nongrum, ki la khlad noh hadien ba ka Bike kaba ki shong ka la shah ban noh ha kawei ka Trok Dumper kaba don ia u number AS-14-C-0598.

Ka jingtip kaba la iohlum da u Nongthohkhubor, la iathuh ba katei ka jingjia ka la jia hynnin ka miet ha ka por 11 baje ei ei, ha kaba kitei ki arngut ki samla shynrang, kiba dang wanphai na Khanapara da ka jingthmu ban leit sha iing (Baridua), hynrei haba ki la poi ha kawei ka jaka kaba kham long khongdong, katei ka Trok Dumper kaba kit Rong ban siang surok, ka la kylla bad ka la leit ban ban ia kitei ki samla kiba shong ha katei ka Bike, tad haduh ba kin da mynsaw jur bad khlad noh haba ki la poi ha ki jaka sumar ha Nongbah Guahati.
Nalor ka jingkhlad kitei ki samla kiba shong ha katei ka Bike, la ioh jingtip ba ki la don kiwei ki briew kiba shong ha kawei na Bus na Assam, kiba la ngat lang ha ka apot jingmynsaw, namar katei ka jingkylla jong katei ka Dumper ka la dei ia katei ka Bus kamai.
La ioh jingtip ruh, ba ka dawbah kaba la pynlong ia kitei ki samla ba kin khlad noh, ka dei namar ba katei ka Trok Dumper kaba la leit ban ia katei ka Bike, ka kit ia ka rong kaba la khlehlang bad u Mawria, na ka bynta ban siang surok, kumta ka jingkhluid jong katei ka rong ban siang surok, ka la pynlong ia kitei ki samla ba kin khlad noh.
Ha ka jingshisha, ia kitei ki arngut ki samla la pynkit mar mar sha ki jaka sumar ha Guahati, hynrei namar ba la jur palat ka jingmynsaw, kaba la pynlong ia kitei ki samla ba kin khlad noh haba la poi sha ki jaka sumar.
Ha kawei pat ka liang, na ka liang ka RBYF, Sengkmie, lyngba u Samla Denis Syngkli, Organising Secretary, u la ong ba ka seng ka pynpaw ia ka jingsngewsih halor katei ka jingjia bad kaba la shimnoh ia ka jingim jong arngut ki dkhot ba shitrhem ka Seng.
Ka seng ka phah ia ka khubor sngewlem sha kiba haiing ha sem jong kitei ki arngut ki samla, kiba la ngat ha katei ka apot jingjia ba sngewsih, namar kitei ki samla ki dei ki dkhot ba shitrhem ka RBYF Baridua Unit.