Da ka skhim ba T.27lak ban pynlang Um ha Khliehshnong Sohra

Shillong, 25 Jymmang:
U Additional Chief Secretery jong ka sorkar Jylla, uba peit ruh ia ka kam pynneh khyndew jong ka sorkar, U bah PBO Warjri, ula plie ia ka jaka sam um sha ki jaka rep, hynnin ka ka sngi ha Umsaw Khliehshnong, Sohra, kaba la ai kyrteng ka Umsaw Multi Purpose Water Harvesting Structure, ha ka jingdon lang jong U bah Cyril VD Diengdoh, SDO (C), Sohra Civil Sub-Division, U Bah D Langstieh, Director Soil and Water Conservation, Mr. K.M. Syiem, Additional Director Soil and Water Conservation, U bah F Tariang, Rangbah ShnongKhliehshnong, Sohra nalor kiwei pat.
Katei ka dei ka pung, kaba la tei da ka dewbilat, ha kaba la pynlang um, ha ki jaka, kiba la tyrkhong um bad ki bym long shuh ban thung eiei, ha ka jinglut kaba T.27lak.
Haba kren ha ka jingialang, ha ka iing dorbar jong ka Khlieh shnong, Sohra, U bah Warjri ula ong ba ka jingring um, kaba wan na u slap, ka dei kaba hap ha ki bynta jong ka thain Sohra suda bad u ong ruh, ba la lap ba katei ka jingring um, ka dei kaba la pynmyntoi shibun eh ia ki briew jong katei ka thain bad ula ong ruh, ba ka jingshisha, ka long ba mynta ka Sohra, ka la kham jyrngam bad kham bun um, ban ia kaba long ha ki snem ba ladep.
Kane kaba mynta ruh, la shim da U Bah Warjri, ba kan dei kaba pynmyntoi shibun eh, ha kaba pynlang um bad U bah Warjri, ula ai jingmut ia ki nongshong shnong jong ka Sohra bad kumjuh ia ki samla pule, ba kin iarap lang bad ka sorkar, na ka bynta ban nang pynbha ia ki jaka sawdong jong ka Sohra bad ba ka pateng, ka ban sa wan, kan ioh jingmyntoi, na ka jingshakri jong kane ka pateng kaba mynta.
U bah D Langstieh, Director jong ka Soil and Water Conservation, ula ong ba u sngew tynnad ban tip, ba ki briew mynta kim ju thang khlaw shuh sha sohra bad u kyrmen ruh, ba ha ki snem ban

wan, ba ha ki khyndiat snem ban sa wan, ba ki khlaw, kin sa sdang jyrngam biang. Ula iathuh ruh ba katei ka tnat, ka la pyntreikam ia shibun ki skhim ha ka thain, na ka bynta ban nang pynbha ia ka mariang, ha ryngkat ka jingiatreilang bad ki nongshong shnong.
Ha katei ka sngi, la pyllait ruh shi kwintal ki symbai dohkha bad la thung ia ki symbai dieng ruh, ha katei ka sngi, ka ban sah kynmaw.