Buh thong ka BJP ban pynrung dkhot, 2 lak ngut ha ka jylla

Shillong: Ka BJP Meghalaya ka la pynkhreh ban pynrung dkhot 2 lak ngut ha ka jylla hapoh kane ka shi bnai kaban sdang noh mynta ka sngi.
Haba kren myn hynnin ka sngi, u nongialam ka BJP u bah Ernest Mawrie u la iathuh ba kane ka jingpynrung dkhot kan long da ka online bad kumjuh da ka offline.

U bah Ernest u la iathuh ba haduh mynta ki la don kumba 43 hajar ngut kiba la rung mynshwa kiba khambun ka dei hangne ha nongbah Shillong bad mynta kin hap ban pynrung sha ka 2lak ngut ha kane ka shi bnai.
“Ngi la ioh pdiang kumba 3o hajar na Garo Hills, 4 hajar na Jaintia Hills bad 43 hajar na nongbah Shillong”, la iathuh u bah Ernest.
Katkum ka jingong u bah Ernest, ka party ka donkam ban pynrung dkhot 20 percent na ka jingdon ki nongthep vote.
“Ha kane ka jingpynrung dkhot, kiba rim ruh kin hap ban pynthymmai nalor kiba dang kwah rung thymmai”, la ong u bah Ernest.
Kiba kwah ban rung dkhot ki lah ban shu ai tok ne miss call ha u number 89 80 80 80, 80 ne leit ha ka NM App (Narendra Modi App) lane ka https://sadasyata-parv.narendramodi.in/ bad kin sa paw ki jingbatai.
Kane ka jingpynrung dkhot ka long ban rakhe don burom ia ka sngi kha u nongialam u Pandit Shyam Prasad mookhejee kaba la leh ha baroh kawei ka ri India.