‘U bah Paul u la shu jler, 13 bnai ngam ia kynduh Mukul: PBM

Shillong,22 Jymmang:
“Ha ka jingshisha ngam kwah ban ia kyn thah ne ban ia kdew kti iwei ia kiwei ha ki kot khubor na bynta ka elek shon” ong u Pastor PBM Basaiawmoit, tang mar ia sdang ia kren bad u Rupang halor ka jingshah kynnoh jong u ha u bah Paul Lyngdoh, u kyrtong ka UDP, ba u Pastor PBM Basaiawmoit u dei u kyrtong MP jong u Dr. Mukul Sangma Myntri Rangbah ka jylla bad kiwei pat ki MLA Congress kiba pyrshah Vincent Pala.
“U bah Paul u la shu jler, la 13 bnai ngam ia kynduh bad u Dr.Mukul naduh u iaiong 2013 ba ngi ia kynduh na bynta ka RTE, ia kren ruh ngam ju ia kren naduh katei ka sngi haduh mynta” ong u Pastor PBM ha ka jingiakren bad u Rupang. Halor ka jingkynnoh pat ba la bei tyngka ia u da ki MLA heh spah ka Congress kiba u jop ruh na Konstitwensi jong ki, kum u ma Ngait lang Dhar bad u ma Sniawbhalang Dhar bad kiwei pat ki jaka kum ka Jirang bad Mawhati ka bym don MLA/MDC HSPDP ne KHNAM, u Pastor u la ong “Naduh ba sdang nga la pan ka jingkyrshan ba baroh ki seng sain pyrthei, kiba sngew iahap ia ka mat treikam jong nga ki wan, bad nga sngewbha eh haba ki wan lei ban kyrshan, ki lah ban dei ki Congress bad ki lah ruh ban dei ki UDP” ong biang u Pastor PBM.
Kum ki para nongiakhun elekshon , nga la ju ia kren bad u Purno Sangma bad u Conrad ruh u ju phone bad dang ha kine ki sngi ruh u phone , hynrei bad u Mukul; te haduh mynta ngim pat ju ia kren eiei, bynrap shuh u Pastor.
Haba phai halor ka jingkynnoh ba ka UDP ka la tyrwa tiket ia u Pastor bad um treh, u Pastor u la ong ba um shym la don jingtip eiei ia kata ka jingtyrwa tiket jong ki, wat tang ka jingkynjoh ktien ruh ngam ioh, iathuh u pastor u ba la kynnoh biang ba kita baroh ki dei ki jingjler jong u bah Paul. U la iathuh ba ha ka jingshisha tang u

bah Hoping Lyngdoh u ba la tyrwa ban ia khun na ka HSPDP, hynrei u la ong ba u la mad ha u 2009, um treh bad u la kut jingmut ruh ban ym ia khun na kano kano ka party hynrei kum u kyrtong paidbah.
Halor ka jingkynnoh ba u ialap niam pat, u pastor u la ong “Ngam ju ialap ha ka kyrteng jong ka niam, nga la pan vote na ki paidbah da ki mat treikam jong nga , kiba long ki National policy/Issue kiba dei ruh ki ba ktah ia ka jaitbynriew”.
U Pastor PBM u la ong ba ki la don ruh ki jingkynnoh na u bah Paul ba ka u la shah rem namar ba ialeh ma –u ( PBM), “Nga tam ia u haduh 60 hajar vote, kumno un ong ba u rem ba iakhun nga” kren kyndit u pastor.
U Pastor u la pynkynmaw ruh ba wat ha ki konstitwensi ba la mihkhmat ka UDP kum na Mawlai, kaba u bah Embhah Syiemlieh u dei u nongmihkhmat bad kumjuh ruh ka Mawkynrew kaba la mihkhmat da u bah Remington Pyngrope, pynban u la tam kput ban ia kiwei pat ki kyrtong .