Khang tala ka KSU ia ka Toll Gate ha Lumshnong

Jowai: Ka KSU JHDU hapoh ka jingialam u President bah Ohibait Dkhar ryngkat ka jingiatrei lang ka KSU Narpuh Circle bad ka KSU Khliehriat Circle, ki la khang tala ia ka jaka lum khajna ba don ha Lumshnong East Jaintia Hills.

Ki daw ba pynlong ia ka seng ban khang tala ia katei ka jaka lum khajna (Tollgate) ka long ba la kut ka jingai por ba 5 sngi ia ki nongtrei bar jylla ban pynbiang ia ki kot ki sla ba donkam kum ka work permit ia ki nongtrei bad ka Trading license pyrshah ia katei ka company.
Ha ka jingshisha ka seng ka la dep ban ia kynduh ia u Anup Bal uba na Kolkatta uba dei u contractor Jong ka Eagle company Pvt Ltd, u ba dei artad u nongshim wai ia katei ka jaka lum khajna, na ka NHAI ban lum khajna. Ha katei ka jingiakynduh kaba ha ka 8 tarik une u bnai bad ka seng ka la dawa ba un pynbiang ia ki tei ki kot ba donkam hapoh ka 5 sngi, hynrei wat haduh ba la khang tala syndon mynta ka sngi, la lap ba wat tang uwei u nongtrei bar jylla ruh um don ia kitei ki kot.
Shuh shuh ka seng ka lap ba ha ka jingleit jurip ia u surok da ka KSU Narpuh circle dang ha kine ki khyndiat sngi, la lap ba naduh Mynkre haduh Ratachera u surok um long shuh. Ka seng ioh sngew ia ka jingud u paidbah dei halor kane ka nongrim ka seng ka leit jurip bad la lap shisha ia katei ka jingjot jingpra jong u tei u surok.
Kumta ka Seng ka ieng pyrshah jur ba kumno ka tei ka company ka lah ban lum khajna, hynrei katba ia u tei u surok pat kam shym la lah ban maramot halor kitei ki nongrim, kumta ka la pynlong ia ka seng ban khang tala noh shi syndon mynta ka sngi ia ka toll plaza kaba don ha Lumshnong bad yn sa leit khang tala ruh ruh sa ia kawei ka toll plaza kaba don ha ialong west Jaintia Hills, kaba dei trai da katei ka juh ka company bad da u juh u tei hi u juh u nongshim wai.