Jowai: ‘Kiar na ka jingdih sikret, kyiad bad drugs bad ruh kiar na ka jingpynjot ia ka mariang, kadei ka khubor kaba paw ha ka lehniam Behdeinkhlam ka Sein Raij Tuber kaba saw sngi bad kaba la kut noh hynnin ka lah sngi U Blei ha Pung Kyntang kaba khot ka Biar Blai kaba don ha Tuberkmai Shnong.
Ka lehniam Behdeinkhlam jong ki Niamtre ha katei ka thain ka dei kaba heh tam ha Jaintia Hills. Ka kynthup haduh 29 shnong bad la wanrah haduh 67 tylli ki Rong lane ki Rot da kaba tam palat shah ia kiwei pat ki Sein Raij.
Ka Khliehriat Sein Raij kaba don shabar na ka Sein Raij Tuber mynta ka sngi ka la wanrah iala ka Rong ban iashim bynta shongsit ha katei ka lehniam Shad Behdeinkhlam lane kiba ki Tuber ki ju khot ka Shad ‘Naisan.
Mynta ka sngi ki kynrem ki lyndang kiba bun naduh ki MDC, MLA bad ki Myntri sorkar nalor ki sahep sorkar bad riew pawkhmat na ki thain bapher bapher ki la wan ban sakhi ia katei ka lehniam ha katei ka jaka.
Ki riew paw khmat ba kyrpang eh ki kynthup ia u Myntri Rangbah ka jylla u Conrad Sangma, u Myntri ka tnad PHE u ma Sniawbhalang Dhar bad u Myntri ka Social Welfare, u ma Kyrmen Shylla (local MLA) ha ryngkat u Chief Executive Member ka JHADC u ma Thombor Shiwat.
Haba kren ai khublei ia ki paidbah ka Sein Raij Tuber, u Myntri Rangbah ka jylla u la ong ba ka sorkar jylla ka la ialeh shitom katba lah ban pynneh pynsah ia ka jinglong tynrai ki paid Riewlum ha kane ka Jylla. Ki jinglehniam bapher bapher katkum ka jingngeit u longshwa man shwa kadei ka tynrai jingithuh ia ka jaitbynriew bad ka sorkar ka dang sngewsarong eh halor kum kine ki program lane ki lehniam.
Na ka liang ka Sein Raij Tuber ka la aiti ruh ia ka dorkhas jong ka sha u Myntri Rangbah hynrei na ka liang u myntri rangbah um shym la kren eiei halor katei ka dorkhas kaba kyrpad ia u ba iarap pynbha ia ki sawdong sawkun jong katei ka Pung Kyntang.
Ka Sein Raij Tuber lyngba u Longdoh uba dei u khlieh jong ka niam ha ryngkat ka jingiarap ki Maji, ki Sangot, ki Dulhia bad ki Shutia ki la pyndep ia kiba bun jait ki lehniam leh rukom ha kine ki saw sngi lai miet.
Mynta ka sngi khadduh ka lehniam la pyndep ia ka lehniam ba kyrpang kaba kynthup ia ka Iatan Bhang, – ka jingiatan tylli da u dieng ar shakap hapdeng ki paid ka phang shathie bad ki paid kiba na ka thain Shatei- lane kaba ki ong ka Phang Wah bad Phangnein.
Ha kane ka lehniam jingiatan Dieng Bhang, la jop ka Phang Nein kaba pyni (katkum ka jingngeit) ba u kba u khaw, ka rep ka riang kan kham bha sha ka phang Shathie (phang Nein).
Kaba kadduh pat ka lehniam kadei ka jingia ‘Slait’ kaba ia syriem bad ka jingiakhun Wrestling.
Ia kane ka lehniam Iaslait la pyndep hadien ba la dep bret lut ba baroh 67 tylli ki Rong kiba mut ki Rot ha ka ktien ki nong Jowai.
Ka lehniam Behdeinkhlam ka dei ka lehniam kaba ju pynlong man la u snem hadien ka rep ka riang bad la ngeit ba lyngba kane ka lehniam lah ban beh ia ki ksiud ki khrei, ki jingsniew ba har rukom na ka imlang ka sahlang bad ruh ba u Blei un da un sumar ia ki jingthaw ba kordor ban lait na ka jingpang khlam ba har rukom kiba lah ban wan lyngshop ia ki shnong ki thaw hapoh ka raid ka muluk.
Ha kine ki sngi ka Khlam ka long ka jingpynjot ia ka mariang, ka jingsarong, ka jinglalot bad khwan-myntoi nalor ki jingsniew kiba kynthup ia ki jingdih pynbuaid ba bunjait bad ruh ka jingibein ia ki ba rit bor.
Ka Behdeinkhlam ka Sein Raij Tuber mynta ka sngi ka la long shisha kaba iphuh ipheng bad la wan ban sakhi da ki paidbah na kylleng ka ri lum Jaintia bad Khasi kiba ym duna ia ka 15000 ngut eiei.
Ki Rong kiba la wanrah ban bret sha Pung ki wan ha ryngkat ki khubor bapher bapher kiban ai jinghikai ia ki khun ki raiot ba ki dei ban kiar na kita ki jingsniew kumba la sneng la kraw da ki Rongs ba la wanrah sha ka Biar Blai.
Phi don ban ong eiei?